قصيدة الشاعر / احمد حسين الحدم

يا الله انا أسالك تزيل العكر

وهي تعبر عن معاناة الشباب اليمنيين في الحياة:-

.............

يا الله انا أسالك تزيل العكر

أدعيك لاطف عبدك البار

يا رب ما قصدي ترد القدر

ما غير لا عد ينزل اجوار

بفضل طه احمد شفيع البشر

نذيرنا بلغ بالإنذار

عليه اصلي بالعشي والبكر

ذي جاء يحذرنا من النار

قال الحدم يا طرف ليش السهر

ما دام لك ميزه ومقدار

بصر على بقعا وبقعا ذُمر

ما تعيي الا الناس الاحرار

لا قلت باخبر خاطري ما صبر

كف شوركم يا اصحاب الافكار

كيف الخبر يا ناس كيف الخبر

اتخالفت يا ناس الاشوار

شبابنا في عيشته ما استقر

بين الدول خرار مرار

في غربته شاف العنا والضجر

ولا ضوى شاف العنا اعشار

وانا لقيت الحل يا اهل الفكر

ارض اليمن تتخزق آبار

وكلنا نصبح من اهل البير

بلادنا تصلح للأثمار

نزرع بلدنا من جميع الخضر

جنات تجري تحتها انهار

جربت حظي في الثمر والشجر

وحاربتني قل الاسعار

كم ناس قبلي قد تعب واعتبر

والمزرعه تشتي تدبار

قالوا لييش انته قليل البصر

القات شوفه سيد الاشجار

قلنا عنغرس ورع وان اختبر

بانغرس الجربه والادفار

اشتي تركتل والحقه بالمحر

وازرع مراهق كانت اقفار

لو شي معي في اليد والا الكمر

لا كد غلاسه وبكار

واقطف من الجربه لمن قد حضر

وما غرمته يرجع اجبار

واقضي ديوني طين لمح البصر

ولا انتظر تنفيذ واحضار

............