قصيدة الشاعر / يحيى عبد العزيز سعد البخيتي

  

يا صبر لا ما يجي الاطلاق لا داخل

جواب على قصيدة اخوه محمد المنشورة امس في الواحة 

..........................

يا صبر لا ما يجي الاطلاق لا داخل

نخرج من السجن ذي هو دائما مقفول

لوما الزيارات ذي لا عندنا واصل

ما يصبح السجن ساعة عندنا مقبول

ذي يجي لنا القات من طالع ومن نازل

الجدعي استال والملحاء هدي مسيول

من جود ربي هدي هاطل قفا هاطل

واحنا دخلنا ولا به في السماء طحلول

ذي نقتبع في المداكي بعدما ناكل

قد كل واحد مسوي في يده كشكول

واكبر بشاره معانا الكل متفائل

بالامر ذي قد تضمن حبس راس الغول

راس البلاء والمشاكل طول با طايل

جريمته واضحه ما منها تنصول

قد نكر افعاله المجنون والعاقل

ونكر الطفل ذي عاده في الهندول

يستاهل الموت والتعذيب يستاهل

العيب ذي قد عاب لا غامض ولا مجهول

له تسعه اعوام متهري ومتطاول

واليوم في المحكمة من فعلته مذلول

لرجع لقرص الجحينه وان قده ناطل

ما ينفع القرص واحد لا قده منطول

با تفتقل والشريعة حكمها فاقل

يبان ذي ما افتقل منذي قده مفقول

حيا ملان الجبل والسهل والساحل

من وايله لا الحديده لا بني بهلول

بعز الاسلام ذي قايس حكا هايل

وكل كلمه في اقواله لها مدلول

حرفه شمل كل معنى وايش عد باقل

تقاصر الرد وانا الشاعر البلبول

لكن فلا بيننا ذي قاله القايل

العذر ذي جمل الغرسي مع سحلول

وافتيك يا بو مفيد افتيك من بازل

كبير جسمه غريب الشكل والتفصول

ما قر له ضرس يجس دائما ياكل

في حين لقفه هو المخروج والدخول

مشهور بالفصل بين الحق والباطل

ويكفل المتهم واللص والمسطول

والختم يأرب با صلي على الفاضل

محمد المصطفى مسك الذي با قول

..................................................