قصيدة الشاعر / يحيى سعد محمد البخيتي

قال بن سعد أمسيت ساهر

قصيدة حادة وقوية يتحدث فيها الشاعر عن قريته الصفاء البيضاء ( الملحاء) غاضبا منها لأسباب سنعرفها من خلال القصيدة

....................

قال بن سعد أمسيت ساهر

مولع من شقاره لا شقاره

وسكان الصفا مثل المقابر

نوايفها وسحولها قفاره

جعلش يا الصفا صاروخ عابر

يدقش ما يخلي فيش حاره

تصابح رمل ما عد فيش صابر

ولا عد من يخبر بالخساره

مفاتيحش وقفلش والدواير

يطعفر لحمهم في كل قاره

ولا عد تزرعي صفراء ولا بر

ولا يصلح ترابش للعماره

ولا لش اسم يظهر في الدفاتر

ولا في الكمبيوتر والوزاره

قد المبنى فتر والساس فاتر

وغشش في البطانه والظهاره

من اهلش ذي بنوش اول وآخر

وعافوا تربتش بيت الكباره

وباعوا مالهم من غير بصاير

بحق القات والباقي شقاره

وتموا واصبحوا باب الوزاير

ولا واحد موظف في اداره

وفكوا دورهم واحلى المناظر

دهشهم جو صنعاء والحضاره

طلع صنعاء يعارض بيت حاضر

وقد باع المفارش والغراره

وحطينا الثقه في صنو ناصر
وروجها ودخلنا مغاره

من افعاله زد الحق حبل شاكر
لناجي واقترع خلف الستاره

طريزان انتعش والبرج قافر
خدعنا واختدع في عقر داره

وليل اظلم وخابر من تخابر

كلام الليل يمحيه النهاره

...................