قصيدة الشاعر / محمد مقبل المعله

يقول ابو عبده شجى قلبي تغاريد الحمام

مرسله للشاعر محمد ناصر الغرسي

........................

يقول ابو عبده شجى قلبي تغاريد الحمام

الطايرات الماكلات الحب والماء العذيب

من ذاق طعم الحب حرم طرفه طعم المنام

والحب في شعب اليمن مجهول مثل اليانصيب

قلبي تولع بالتي في خدها الايمن وشام

حبه عدس في وجه ابيض صافيا مثل الحليب

لها قوام اجمل من الجرمل وهيفاء القوام

اذا رمت انسان بالعينان يا ناس كم تصيب

تذوب الفتيان وترمي من لواحظها سهام

بالخص لا عد كان مسكين الذي ترميه قريب

تلبست انسان بعد العافية ثوب السقام

وتثنته من بعدما كانت تناديه يا حبيب

اما انا لما تصافينا تخارجنا قيام

خارجت نفسي منها وصحيت من قبل المشيب

انا الذي ماسك بعروه واثقه لا انفصام

عروه وثيقه من زقم فيها حياته ما يخيب

يارب انا اسالك بجاه المصطفى بدر التمام

اغفر ذنوبي واعفو عني يا سميعا يا مجيب

من بعد هذا قال ابو عبدالولي برسل سلام

سلام يملى الشعب من مينا الحديدة لا حريب

لك يا ابن ناصر عد ما شنت عثاكيم الغمام

مليون يتصدر سلامي من حشى القلب الرغيب

يا الهيم ذي شل المحدش واعتلى فوق السنام

والتف من قبل القوافل فاطر السن المنيب

يا صلب ناصر دقت الساعه وطير السعد حام

والناهض اقبل بالمثوره خيل ناهض غصيب

شوقي تمنيت الليالي مثلما كانت قدام

والماضي الحاضر ولو نفعل حجر تحت العسيب

ضاقت بنا الدنيا من اسباب المآسي والوئام

وزاد في القلب الحمومه وانهك النفس اللهيب

يا ما صبرنا هل يكون الصبر عاما بعد عام

زاد العنا والهجر كله من عيا الوقت الرهيب

من ينصف المظلوم للتقت به اولاد الحرام

وكل يوم اصبح محيد كنهو جذمي غريب

احنا نوينا السير لا درب السعاده والسلام

ولكن حب الذات خلى كل شخصيه تعيب

والمارد الجبار متعرقل مع الست المدام

ما طاعته كلا ولا عاده بعشقتها طريب

يا طارشه خيلي وردي لي من الطارش كلام

اما وان ولا فماشي ذيب يلحس خشم ذيب

ما شي على الشارد ملامه تالي الوعد القسام

كما اظلمت لابد ما تفرق ولو طال المغيب

لما بدت هيفاء عليا كنها بدر التمام

قابلتها بالود والف بالسلا القلب الرحيب

من اجلها ضحيت با ابي رزح ظهري والحزام

والسيف ذي كنت اهتري به يوم شلات الركيب

واليوم خلتني وسارت مرتديه با اللثام

كأني غريب الدار يا ابن ناصر الباطل عجيب

بالله يا عز المعالي هل لكم في الحل زام

ارجوك لاشي حل خبرني ترى قلبي حشيب

لا تعجبك نفسك ولا حاجه لرجاع الملام

ما صاحب الأ في الضروره يلقي الصاحب صليب

خف النظر يا ذاك جابر وانت مندوب الفهام

لا لقيتني مكروب فا انا داعيك داعي مصيب

خولان تعرف كل واجب في سلى ولا خصام

وانته من اهل العرف انت انسان في وضعك نجيب

غيرك عليا الله يشهد ما معي له قلب رام

اظهر عليه الامر مهما كلف القلب اللهيب

لكن بشفك دلني قلبي وذا المعروض هام

ولا فنا بين القبايل يعرفوا طبعي اديب

انته بتعزز وهذا الامر من طبع البهام

خيبت ظني فيك يا فرع القبيله والخطيب

وانا الذي يذكرني الصاحب متى جاه الطهام

التف حوله وانفذ المطلوب من جور الطليب

اقسمت لك بالله لو دق العنا جل العظام

في واجبك ما ابخل ولافعل مراعتي هانقيب

يقول بن مقبل محمد زاد في القلب الخرام

من كثر ما بي حرقت نار المداعه للقصيب

والصبر جايز لكن اوقات الوظيفه والدوام

لا ساعة اثنعشر وبعدا يسهل الامر العصيب

ولافبا اوكل حليفي وانتسب لا حيد زام

علي جبير الفرع واقل يا علي ناول وجيب

وافوضه في الامر وابذله رهينه والتزام

وافعل لابو مانع شهاده عرفها عنبر وطيب

وايده واهديه من بعد الشهاده بالوسام

وامثله في شعب قحطان اليمن شاعر لبيب

والختم باصلي على احمد ذي تشفع للانام

تعداد ما هلل وكبر واعتلى المنبر خطيب

..............................................

قصيدة الشاعر / محمد ناصر الغرسي

جواب على قصيدة الشاعر محمد مقبل المعله  بقافية مختلفة....

................................

بو نصر سيروا دلى يا قوة الحمله

ماهو عليا لكم صايب فهو مبذول

انا وانتم اصحاب في البطنه وفي القبله

لاحد يبى قبيلها والنبي محمول

ولا تقولون في بطني لكم زدله

ولا دواحش ولا عندي لكم مقتول

ولا علي لوم في الطلعه وفي النزله

لا قلت با اقول وانا عارف ايش با اقول

حبيت اغني مع ذي يضرب الطبله

حين جيت والشعب من كل الجهات مطبول

حتى تحيرت في الخرجه وفي الدخله

ما زد دريت اين مخراجي من المدخول

لو كان لي جهد ابز البحر في شمله

والبر يشتل لا اسفح عرضها والطول

وكل حيد اطحنه لاما يقع رمله

واخرج الكنز واكسب جوهره واللول

دحره لحسادنا ذي ما لهم شغله

ويشتو ابقى لشان اشغالهم مشغول

اربع قصايد تصل واربعمية هجله

وكل واحد يقول انه هو المعجول

ولا احد اعطى لنا فرصه ولا مهله

هله في الشرع ولا عرفنا ممهول

الله يرجع على من قد غوي عقله

ودي يقع من غوي عقلة هو المعقول

ويعرف ايام فيها شغله او عطله

كما ان لي طبع ما يقبل خبر مجهول

لا من مرادي ولا من صاحب القفله

ولا حشيشي ولا ذي من بني بهلول

ولا من اولاد مرفد لا ولا المعله

ولا القفيلي ولا القيفي ولا سحلول

كلين له قدر غير الغش في المخله

في الوقت ذي كان صافي قد رجع مخلول

ما عادشي فرق بين العلب والنخله

قد صاحب النخل صابح نخلهم منخول

اهوين يا شعبنا المغلوب والفعله

ما حد ظهر له من الفاعل ولا المفعول

عيبان ماشي معه ركنه على القشله

ولا براش الاشم جنب الصمع مشلول

ياهل ترى عادشي للمشكله حله

اولا قد الشعب من حلاتها محلول

ان لم يكن للمواطن حل في الدوله

فالدهر قلبه بقلبه كل شي بيزول

ما واحد الا وسوا في اليمن بكله

ولا درا الا وهو من سلطته معزول

وهكذا من غفل واغتر بالغفله

ما يشعر الا وهو من غفلته مغفول

حب الطمع ضيع ارباب اليمن واهله

واصبحت من جيز عشاق الطمع مهزول

حمالة العونيات وا لابس البدله

يا ذاك كل الخبر بالدجل والتضلول

كلفني اعدل مع اصحابي من العدله

حين جيت والشد في كل الجهه معدول

  

حسدوني الناس حين بين اصتعف سقله

كودين حصلته الا حين انا دخلول

به ناس قد كل واحد في الخامسه فله

ومن رفاهيته بينوم في الهندول

وبعد مدة سيضهر نجم ابو سبله

ويلف ويدور من ايلول الى ايلول

كمثلما عنتر العبسي مع عبله

وينقض الغزل ذي هو في الكبب مغزول

ما اليوم ما عاد في قلبي ولا خصله

لولا وصلني خبر مثل الشلل مشلول

كلفني اشعر على المجهول او مثله

واصعر على المركب الغواص والاسطول

يا معله انذر بحضره و انظم الحفله

قد قلك ابن الحريبي ان قدك معلول

عندي دواء للمرض ذي فيك والسعله

لا انني اوحيت صوتك في الشريط مسعول

والارض عدله وابو عبد الولي عدله

وذي بيكذب جعله في العيون افلول

ثور عليا رجال الشرق والقبله

لكن فلا صاحبي في غلطته محمول

من ما ادعاني غلط لازم علي شله

ولويصلني وجع من صاحبي مدبول

با اشل ما قال فيني صاحبي كله

ولعنة الله على الكذاب والمحيول

وا زوع حملي كما زاع الجمل حمله

ودي تظلي مخوتنا عليها طول

ولو قد اشعلتها يا صاحبي شعله

ما اشتيشي الشعر يا معله يقع ممعول

ولا اشتي اطرح عليكم طهمتي عمله

من خوفي يكمل عليكم منجم البترول

ودي خبرنا يقع موزون با الوطله

ولا فلا اهم امريكا ولا اسطنبول

ولو شهد لك جبير من اجل تشهد له

علي حمود الهلالي ونعمك حنكول

ما عاد باقول به شي قد وصل جمله

قد كل شي بالدفاتر عندنا مجمول

خولان تعتز بالمعله مع القبله

وتقدرك فوق قدرك بالثنى مدبول

لا انك انسان تعطي كل حد فقله

وانا اشهد ان انت شاعر عبقري بلبول

ولو تحديتني ما شي علي قذله

ما غير ياذاك ماحد ذي يجي مصمول

ولا معي كبر سع ما سينة الفتله

ولا انا من حدا خايف ولا مذلول

ماهل ظروفي لها في حكمها شله

أخر جوابك وسائلها من المسئول

هذا ولا نا مخزنشي من الذحله

ولا فتاتي معي ذي طرفها مكحول

لا زلت معزول واحبابي في العزله

من فرقهم قد كرهت الربح والمحصول

العفو يا صاحبي بالله عليل بالله

قفلت بوب الهواجس والهوى مقفول

ذكر النبي ذي عرج للعرش من فضله

واختاره الله خاصه لامته مرسول

..........................

قصيدة الشاعر/ محمد مقبل المعله

(جواب الجواب) على قصيدة الشاعر محمد ناصر الغرسي في قصيدته ( بونصر سيروا دلى ياقوة الحمله)

.........................

يقول ذي حل وادي من حلى ظله

غنى الهزار الاديب الشادي الهركول

في شُم الارياف ربي بالعفا بله

من تعداه يصبح في الثرى مجدول

تحميه غمران ماهي قوم من قله

من جملة اعداه من عجاتها مكفول

الليلة اوحيت قول القلب ما مله

كنه من الباردي سيف الله المسلول

من ذوقه القى بقاع الارض مشتله

والقاني امسيت مثل الطايش المخيول

فقلت حيا من ذا القول من قوله

يرحب عدد ما اوطت الناوه من الحنقول

قبلت للقول ذي جاني مية قُبله

ميزة وتقدير للبداع والمرسول

يرحب على العين والحاجب مع المُقله

واشعر بالاجلال في الترحيب والمسهول

لو بالمثل صادفتني قبصة النخله

ما همني وان عرفت الشد بالتميول

من واجبي ضم ريعي وانفي الزله

وابقى على طول عهدي للوفاء معزول

واتحمل الصبر واحذر منقد الحكله

وادعم صديقي بمعنى القدر والتجلول

واصبر على صاحبي لوجار في مُطله

لني ذي القيت نفسي للخطاء مدلول

هذا جزا من بعرفه للعرب دله

معنى الدواحش كأنه من بني دشمول

والصاحب الجيد ذي قد صابني فعله

لازم عليا احمل العله مع العلعول

واتقبل الرد من خيره ومن بخله

لاباس ماشي مهمه من قدى التسجول

من بعد ذلحين يا هاجس معي هله

لا ترتهب من ذليل الميل والتثقول

واقول من بحر لا قِله ولا ذله

ما هاب من قوة امريكا وبي اشكول

صافي مصفى نقي الماء من الوحله

كأنه شهد من طيب الجنى منحول

والقلب صافي عليا الله من غله

صافي كما الجوهر الخلاق والشملول

ما يعرف الهيم لا زُغله ولا مُغله

كلا ولا يعرف الرجاح والتميول

الليل يا ابن العجارم ترك الضبله

دين الرجاجيل مثل الطعن في الحلول

اوصيك لا قد دعالك صاحبك جب له

لا تعتذر كي تخلي صاحبك مفشول

ولا تقصر بحق انسان او تعله

ولا كما قلت لا لاشك هو مهبول

قصدي يكون الصحب مقرون في حبله

لا تلقه الود من شان الجفاء مفصول

والزرب والدحن والتهديد والضوله

لا شك ماهو يحرك قوته باسطول

هيا ابن ناصر نوى للهيم من حقله

عيرتني يوم جا في حلقي السقلول

في ضنك ان هي داخل روحي الخضله

ما غير قدني من اصحاب الحسد مشهول

  

حسدوني اعداي حين بين احكم النقله

وانته تعنيت بي والقيتني ممطول

ولا فنا مثل بحر النيل والدجله

ذي حيد الروس وانفى مملكة ديغول

درست في لعبة الشطرنج والسله

وافنيتها درج في التجويد والترتول

وكل شاعر انا ما خوف من قزله

لو كان راكب عنانه مثل رأس الغول

لو كان جهدي يبز البحر في القُله

لا اسقي به الشعب مخروفه مع التمثول

وا عرقل السير في علوه مع سفله

ولقي دموع القوافل من قفى هملول

غصبا على الشعب ذي ما فاق من جهله

واصبح من الجهل مثل الصعبي المصبول

لجل الطمع عل لهله والطمع عله

واهل الطمع خلوا الشعب الابي ممهول

يا هل ترى عد لهذه المشكلة فقله

اولا قد الشعب من كثر الشغل مشكول

يا ما اسهر الليل واصبح مثلما الابله

ادرس مواضيع قدني منها مهزول

به ناس في قمة التاريخ مُحتله

وناس مثل الضعيف الضاين الفرهول

قد شلت انجاف صدفه حكة القمله

من قل ما في يده قد عجه التذحول

هذا اذا لم يكون لفت النظر حوله

في التالية ويل للدجال والدجلول

هي با تدور الدواير وادرك النبله

في وجه من با يخلي فعلها منفول

في القلب ذي يلقى الصم الصفا طحله

ويلقي الحيد دخانه كما العفكول

والله على رأسي الغالي مية والله

ما بعطي المستمع الا عِشر تبدول

يا عز الاسلام مشتي منك الزبله

عني تفك الحزام الهندي المسقول

عيرتني بالشلل والشل والشله

وافعلتني في ملفات الخبر عرقول

اسقيتني من نقيع الحنظل الحثله

والقيتني كا لحجر في السايله مزقول

ناديت من رابية هران والتله

يا شُم خولان وابن الشامخ المصلول

اينو فتى الغرس ذي نصر البطل نجله

عز الهدى واخبريني او قده منقول

لا رحمة الله اولا جات له رحله

اولا قد البحر شل الهيم والاسطول

ردت عليا عُقل غول البلس واهله

بأن ابونصر ما قد يعرف الماصول

في نعمة الله لا حوله ولا شوله

مغمور بالعافيه هلا قده كسلول

ادا له الله من جوده ومن فضله

مالك وله في الصداقه روح يا هنفول

فقلت يا ناس انا محتار من اجله

قلبي من الفُقد عاف الشرب والماكول

يا اهل غول البلس ما هذه النطله

الله انا اعنيه لا القى منكم سخبول

دلوني اينو حليفي مشتي الرفله

ذي في قصيده عليا حرك الكابول

  

بعد الجفا هدني بالسيف والنصله

لاما اندهش خاطري من زرة البرغول

لكن فلا صاحبي لا ضرني سهله

باصبر على جرحي الدامي بلا تزبول

واتحمل الجاسره في الغزل والدقله

وكل ما بان في الطلاع والتنزول

واجعل صديقي حنيضه واتبعه هذله

ما نشتي الشعر في شرعه يقع مفتول

ولا اقبل العذر ولا الميل والهدله

من صاحبي ذي تركني لي سنه مهزول

حد يقبل النار تحرق في حفى رجله

وعاد جهده يرد الجرح بالتعدول

خولان يهل الدرك والشرع والمله

حد ينذق المال حقه في وعا مزدول

طبع المثل قال لا اعوج صاحبك صله

ولا توجه عليه اللوم والتهدول

والعفو من كل شاعر يطلب المعله

منكم رجا لا يخيب الظن والمامول

وانعم بخولان يا حيا بها عوله

حيا عدد ما يجود الناهض المسيول

حيا رجال المعادي ساعة القتله

ذي لا انكفت تلقي الخصم الردي مخذول

اما محمد ناصر ما الحقه خُله

ولو قد اقفى وطال الوعد والتاجول

خاب الامل بعد ما كنت احسبه وسله

للوقت لا شفت ثوبي بالشطل مشطول

لنه ولد عرف من اصله ومن فصله

ومذهبه يعرف التحريم والتحلول

ومن تملق فدقنه خس من نعله

وذي بيكذب جعل له طعن في الحنصول

شوقي تمنيت نص الشعب من شكله

تبقى لشعب اليمن قدوه من الحربول

ذكر النبي ما يلوح البرق في سبله

ذي خصه الله وحبه لامته مرسول

.................................