قصيدة الشاعر / عبد الله احمد واصل

قال ابن واصل يا وثيق الحبالي

بدع مرسلة الى عبد الخالق حسين الشنفي

..............................

قال ابن واصل يا وثيق الحبالي

بسمك بدعت القول يا خير من قال

واشكو اليك ضعفي وقل احتمالي

وافوض امري اليك في كل الاحوال

يقول ابو ماجد سهرت الليالي

معي قضيه خلت البال شغال

وامسيت ساهر في مكاني لحالي

ادور فوق الفرش من حال لا حال

ما هو سهر من خوف او قل مالي

من فضل ربي عندي الجاه والمال

وفي المهمة ما يقلوا رجالي

في ظرف ساعه يحضروا الف رجال

قد ربي ادى كل حالي وغالي

نعمة عظيمة غطت الرأس والشال

كل السهر فيني من ام العيالي

ذي هي دواء قلبي وبابه والاقفال

مما بها يا ناس مارتاح بالي

ولا لقينا له مداوي وحلال

لو عافيتها تشترى بالريالي

لا ادفع ثمنها الف ناقه وجمال

مهما خسرته في الشريك الموالي

ماهو بنظرة لا عيونه والاكحال

شوقي بتخزينه وخلي قبالي

هو يسمع اقوالي ونا اسمع اشقال

واسامره وافعل معه ما بدالي

انا اشهد انه يمتلك راحة البال

كم لي من الشاهي وقشر القتالي

كما وقايانا حسبناهن ارطال

لكن الى ربي رفعت السؤالي

حاشاه يرفض مسئلة اي سئآل

الليل يا مرسول شد الرحالي

الى الحدا حيث حلوا الناس الابطال

واسئل على ذيب الرجال الهلالي

ذي لا هجاه الضيف غداهم اعجال

ابووليد ذي قد سكن حصن عالي

نايف جشايش ذي يجي خصمه اقبال

سلم جوابي للصديق المثالي

والعفو لاشي قصر في نظم الاقوال

شعرت من غُلبي ومن ضيق حالي

واصبحت في الميدان فارس وخيال

شكيت لك يا اخي بما قد جرالي

واشكي على من كان شاعر وخيال

لا قلت باعمل في توسع مجالي

حنبت في القعده وفي شهر شوال

فيني طبيعة ما اشتي الا حلالي

والله عالم بالنوايا والاعمال

وانه من الاوضاع كم ذي نصالي

وانته تدربل من محلك بدربال

غيّر علينا الشوم والانعزالي

ذي طول عمره عاشق القيل والقال

وازكى صلاتي ما يدور الهلالي

تغشى محمد سيد الخلق والآل

................................