قصيدة الشاعر / عبد الاله محمد الكبسي

شفت النجوم السامره تتهجد

 القصيدة غزلية لشاعر من قرية (الكراع ) ...

...................................

شفت النجوم السامره تتهجد

وسمعت للطير الشجي تغريده

وامسيت ساهر والقمر لي تشهد

والشمس في الصبح المنير شهيده

الهم فيني زاد والضيق اشتد

من الالم ما بش دواء بيفيده

عجزوا اطباء المدرسه والمعهد

وعجز طبيب النفس هو وعميده

وانا على كاس المحبه اتردد

وانوح وابكي واطلّع التنهيده

مُغرم وهايم في هوى غيد اغيد

يريد حبي مثلما انا اريده

والعيد جاء كلن بعيده عيد

وابو محمد ما تهنا عيده

يا رب حقق منيتي والمقصد

احيا بمن اهوى حياه سعيده

لني بدونه مستحيل ان اسعد

دائي فراقه والدواء لي بيده

اهواه حب الأب لبنه وازيد

والبعد عنه للألم بيزيده

حبه جرى مجرى دمي واتعمد

بدماء جروحي واعتمد تعميده

لا زلت في حبه اسير ومقيد

باقي على عهد الصبا ما احيده

لو يحكم الحاكم بسجن مؤبد

ماخاف من بطشه ولا من كيده

ومن هوى ما يختشي من يحسد

ولا من الحاقد ولا تهديده

قولوا لمن احبتته يتأكد

ان من وقف في دربنا لا ابيده

واعبر من اجله في الظلام الأسود

واقطع مسافه هايله وبعيده

واهنا معه طعم الغذاء والمرقد

بعد السهر لا ساعة التحميده

واسكن معه في مسكنه والمعمد

واللفظ يتبين مع توكيده

ون جاء معي يسكن بقصر مشيد

في العاصمه ولا المخاء او  ريده

والا الحدا معمد ابي هو والجد

ومسكني فيها حجر تشييده

وافراحنا في كل يوم تتجدد

وما بلي لابد من تجديده

...............................