قصيدة الشاعر / عبد الله محمد ناصر زياد

ابو ماجد يقول ما فات له فات

بدع موجهه  للشاعر الكبير ابراهيم مفتاح

...........................

ابو ماجد يقول ما فات له فات

ولكن ما مضى ما قد نسيته

نراجع كل شي زينه وشومات

على الواقع وذي ما قد محيته

الا يا هاجسي من بعضها هات

وقل لي كلما فيها قضيته

كما كل القضايا في ملفات

ومحصيه ومنها ما رميته

من المخزون مؤلم بعض الأوقات

وفيه احداث مكروهه مقيته

تراكم بعضها مره ومرات

وتتوالد ولو من بعد ميته

سلوك الناس يتّرجم محطات

ولسانك يوضح ما حكيته

عرفنا اشخاص حد عايش وحد مات

تقل ياليت وانته ماعرفته

يبين معدنه موقف ولزات

يبيعك بخس من ماقد شريته

ويظهرلك بفعله سوء نيات

وكم يا كم من اوهامه نهيته

ونا له ناصحي من غير ليات

اقول الصدق في ما قد رائيته

طريق الصدق ما فيها مطبات

سلكها ابي ونا بعده مشيته

مريض الفكر ماشي له شرنقات

علاجه تتركه ولا كويته

ولا تنفع حبوب الصيدليات

وقد حاولت لكن ما شفيته

جراح الفكر ماشي له معدات

إذالتعليم في الصين استقيته

وخذلك من علوم الأرض زهرات

وقدرك يرتفع من ما جنيته

بعلمك والأدب تزداد ميزات

كمن الأصل يبقى في مبيته

يسود القوم ذي هو منكر الذات

وتكسب بالعمل ماقد نويته

وحب الناس لوسارت وما جات

فلا يمكن تصلها ما عديته

ولا تركن على اصلك والمقامات

ولو تنسب الى طه وبيته

تأمل ما يجينا في عرب سات

ربيتاهن معي اوما ربيته

يقًرونا المعادن والفلزات

وعدبه غيرهن ما قد سميته

  

ونا ونته معانا ولعة القات

وعاد السم منهم ذي سقيته

ونتخاصم ونتشارع على ابيات

ولا هن لك ولاانته ذي حكيته

معك زامل معي باله وهيدات

وهذالقول قالت به بخيته

وذاك البدع من حق العصيمات

وجاه الرد من قول التحيته

من الموروث له شله ورزفات

ونا مثلك مولع به هويته

كفايه قربو بين المسافات

ويركب كل من منكم ونيته

ونافسهم على سوق الصناعات

وقوم انتج لنفسك ما بغيته

وثابر واجتهد يكفيك ونات

ورتب وضع بيتك ذي بنيته

ولا نهمل عملنا في الزراعات

وماذي ينتجوه الصين سيته

رسولي قوم يا حق المهمات

وجهز لك حمولك وامتطيته

وسافر بالسلامه والتحيات

طريقك سالكه مهما لويته

بلاد آنس بلاد اهل المروات

ومن فيها سكن من ذاع صيته

عويله تمّن الخايف ومنجات

بني مفتاح لأ ما قد دريته

لهم تاريخ حافل بالبطولأت

اذا ما تعرفه مانا قريته

وسلّم ما كتبته في وريقات

لبو عزت وجبّه ما هديته

من العوده ومن طيب العطورات

وجبًه من رجاله من لقيته

تحلى لا قدك عنده بالإنصات

وشل الرقم منّه لا ضويته

نكمل ما نقص بالإتصالأت

إذاما استر يجي عندي فجيته

ختام القول لي في الشعر هبات

ونادر ما اقوله اوهجيته

إذا شي قصر اوهفوه وزلات

فعذري مسبقاً فيما حويته

صلات الله في سوره وايات

على المختار من دمي فديته

..................................

قصيدة الشاعر / ابراهيم علي محمد مفتاح البخيتي ( ابو عزت(

حصرياً بواحة الحدا. جواب على قصيدة عبد الله محمد ناصر زياد  .

..................

ابو عزت يقول البارحه بات

 بهيئة متغرب بين اهل بيته

انا في هات واهل البيت في هات

غفوا وانا منامي ما غفيته

وكيف اغفو وفي جيبي حُبيبات

من الياقوت ذي كرهن لقيته

خبر حيوا به ألاحيا والاموات

وبالتاكيد في قلبي خبيته

الا يا مرحبا يملى المحيطات

والأبحار التي فيها رسيته

ترا حيب لا تعد الا بالآت

كفيته يا ابا ماجد كفيته

رفدني امس بن داعر بكلمات

فهمنا كل ما فيها عنيته

وفهم الاسئله نص الاجابات

جُبيته بردي يا ابا ماجد جُبيته

سقى الله الحدا خير المحلات

سقاها وانت من ماها سُقيته

محل اهل المواهب والهوايات

ذي أترعرعت معهم وارتبيته

الا ليتك في ايام المعانات

معانا لا بلاد انس سريته

حنيني ما يحنين المنيبات

على النواش ذي ما قد اويته

على رغم الروابط والعلاقات

جفاني حصن عمري ما جفيته

لعبد الله زياد ابيات زينات

ستبقى في ذواكرنا مبيته

معاني من قراها خمس كرات

وقي فكره بها مما وقيته

فكر مترابطه ماهي فكاهات

..............

قويه من جميع الاتجاهات

تريح القلب والله ما تميته

بوعيك في معانيها علامات

تآلفته بوعيك واهتديته

لجدك في سماء الشعر غيمات

شربته منّها لا ما  ارويته

ولك في قلبي الضيق فضاءات

تفضل زورها لا قد فضيته

كفى  يأهل الأفكار السقيمات

افيقوا النوم ذي قد هنيته

ولموا شملكم يكفي تشتات

نوايانا وارانا شتيته

تفاوتنا وفاتتنا القطارات

جعل للاولياءميته شميته

ولات العُرب خُدام الولايات

طغوايا من على العرش استويته

هم الي دخلونا في متاهات

نعيته من سكت عنهم نعيته

لماذا  لا يلبون النداءات

نداءات الشعوب المستميته

كفى قمعا وتخويفا واسكات

متى المخذول با يرفع صويته

متى با نستعيد الابتسامات

ونتكلم بالافواه السكيته

خلايقنا لنا كانت مقاسات

اذا اتواضعت لصحابك عليته

وذلحين من معه في البنك شيكات

تآلف سمعته وامتد صيته

تخلُفنا سبب كل الخلافات

لمه يا شعب بالجهل اعتنيته

تحياتي لبداع المقالات

عدد يا مرسلي ما قد خطيته

مقالاته على دربك اضاءات

اذا ما ظلم الليل استضيته

.......................