ابدع بذي خالق حبوب الطشاش
في ابريل 1996م ..
...................
ابدع بذي خالق حبوب الطشاش
ذي كون الماء والطشاشه
يا حارس ابن ادم وهو في الفراش
والرزق منك والاعاشه
لو ابن ادم عيشته والمعاش
من شخص لا يقطع معاشه
يقول ذي حل الحصون الجناش
بين النماره والحناشه
ذي يكرموا ضيفانهم بالكباش
ويقابله بأحسن بشاشه
يرتاح من كثر السلا والبشاش
وايش ما طلب جا لا فراشه
وان حب سِيره سار من غر نقاش
ايش للمضيف في نقاشه
ابو وليد القلب فيه ارتباش
لا ما ربشني من رباشه
امسيت ساهر ليلتي لا غباش
احتاش في فرشي حياشه
والنوم حّرم عين عبده وطاش
وطاش عقلي من طياشه
لا ابراش يالليله ولا انعم مساش
امست بش مثل الفراشه
يا نفس عبده لييش رفضتي عشاش
وقد تعبنا لش مراشه
مفتونه او لا حد بحبه رماش
اين الحلى واين والبشاشه
خفي عليا مالش الا سلاش
ولا قلبتيني قشاشه
بيتي ومالي لش ولا ما كفاش
بازيد عاشه فوق عاشه
وان الخطاء عندش عرفتي خطاش
لا تربطي جرحي بشاشه
ما دام قد وجّدت زادش وماش
والزين ذي زين نقاشه
ذي لا ذكرته زاد قلبي انتعاش
العطر ذي داخل غراشه
لو خايروني من عدن لا براش
والشام سهله والجناشه
او قطعوا لحمي على اربع خياش
لا اختار خيشه من خياشه
سقاش يا ديره سكنها سقاش
واروا الثمر بعد انعطاشه
روحي حياتي مسكني والعشاش
سمي وطبي في حجاشه 1
هو البصيره والبصر والفلاش
ما يولع الا من فلاشه
ان كان غيره لو يجي لي بلاش
ايش با يسوي لي بلاشه
به فرق ما بين اللبن والرواش
يهل الهوى دون الخواشه
صلوا على طه طبيب العكاش
ذي فاز في حبه عكاشه
......................
حجاشه = ما يُخبا تحت الثياب قريب من الصدر
0 تعليقات