قصيدة الشاعر / حمود علي محمد الاسدي

حمود علي قال رغم الفقر والشحه

....................

حمود علي قال رغم الفقر والشحه

بنضل احفاد حمير واسمنا موضوح

مهما جهلنا الذي عاده بدون لوحه

ومصدره من قواميس العرب ممسوح

احنا اصول العرب والتاج والسبحه

تاريخنا منتسب من عهد سام بن نوح

ايماننا والامانه والقلوب سمحه

كلام سيد البشر ما هو كلام ممزوح

وبعزتي سوف افضل عيشة البرحه

ولا اسكن القصر وانفاسي معه والروح

لاتستغلون طيبتنا ولا الشحه

فأحيان نضحك ولو وسط الصميم مجروح

عليش هذا العداء ياجار والطفحه

وايش السبب تغلق الباب الذي مفتوح

مسموح من بو يمن ياذي نويت جرحه

انته عليك اعتذر واحنا نقول مسموح

قهرتني قهر آثر في الكبد قرحه

وانا الذي ياصديقي لك بذلت الروح

لكن من الآن افضل نطوي الصفحه

ننسا الذي فات ونفكر بما عيروح

فلا تعود ثانيه للهرج والشطحه

وخلي الباب كما هو ياجوير مرزوح

والا سنضطر الى كسره ولا نطحه

وذي على الباب دمه بايكون مسفوح

احنا ملوك العرب بعقولنا الرجحه

وواضاعنا قط ما تحتاج الى تصحوح

ولا احدآ من جويره قد يقول احه

ولا يناطح وهو بالتاليه منطوح

ستعدم المال والترفيه والصحه

وتعيش حاله من الاحباط ياممدوح

ولو تطاولت في البنيان والصرحه

فلو بلغ للسماء بانجعله مكسوح

وتعيش مشرد على كل الدول نزحه

مهما تنعمت حظك في العذاب مطروح

لابد ياتيك يوم تتوسل الدوحه

وتطلب العون وانته بالدموع تنوح

واحنا يعم البلاد الخير والفرحه

نرجع كما كان جدي وضعه المفسوح

هي الحياه هكذا ماشي بها راحه

والعز مطلوب اما المال يجي ويروح

والورد ريحاتها متعدد  الريحه

حتى الطعام والشراب سامج وبه مملوح

هذا خرج فصل والثاني لكم شرحه

لكن وراء ما تردوا والسؤال مطروح

صلوا على من سيشفع ليلة الصيحه

علي النبي ذي شهد له عذقها الملموح

................