قل للبزي عبد الله الثوره فوايد
موجهه الى الشاعر عبد الله محمد ناصر زياد بتاريخ
16 /6/ 2013م ....
....................
قل للبزي عبد الله الثوره فوايد
والخيل عادوا حقنا
واحنا مع ذي با يرى ثروه وعايد
للشعب ننعم كلنا
وارى اليمن في خير واحنا مثل زايد
ما عندهم هو عندنا
ثوره ورى ثوره ولا زلنا نجاهد
ضعنا وضاع اجيالنا
احنا اغنيا في الراديه والا الجرايد
وإعلامنا حاكم لنا
والثار فينا والطمع في كل قايد
من ما حكم باع ارضنا
يحكم ويتجر في المواني والموارد
واحنا ندقدق روسنا
كم تجرعنا الصبّر حامي وبارد
وكم جرع ما ضرنا
وكم كوارث في اليمن كم ذي نشاهد
وكلهن من حالنا
وانما شبع زارد يجي عشرين زارد
واحنا معانا اصواتنا
وايش النهايه يا بزي وايش انت عاقد
لانك اخبر مننا
ما نا قطعت الياس لنه شعب حاقد
كم قد بذلنا ارواحنا
واحلامنا سارت لعباد المساجد
والشعب خرب ما بنا
والجار يشعل نارها والشعب راقد
ذي يدعمونا للفنا
الله يقطع كف من مده وساجد
ولا درينا ايش غُشنا
اكبر جرايم منهم واكبر مساعد
يا رب اسالك عزنا
اين العقول الواعيه واين العقايد
والجهل خيم فوقنا
وازكى صلاتي ما نزل سيل البلايد
وعد ما ليله دنا
على محمد ذي شفع من نار واقد
يا ربي اغفر ذنبنا
.........................
قصيدة الشاعر / عبد الله محمد ناصر زياد
جواب على قصيدة يحيى سعد محمد البخيتي بتاريخ 17/6/2013م ..
................
ياخال يحيى مرحبا بك ومرحب بالقصايد
من حدكم لاحدنا
في الشعر لي رتبه صغيره وانت رايد
الفرق شاسع بيننا
اهلا وسهلا مايشن المزن من بعد راعد
من قبلنا او بعدنا
الوضع بايسبر تعدينا الشدايد
الزرع جاهز للجنا
يشتي تكاتف كلنا ماشي محايد
ولانقل هذا ونا
باب الفتن مفتوح يكفينا مكايد
المذهبيه سُمنا
والتفرقه هذا البلاء من فعل قاصد
سلاح يعمل ضدنا
الدفع مسبق سلموها بالوصايد
من قُم اومن جارنا
يمسي معانا مختبي تحت الوسايد
والصبح يصحى له معانا
لكن معه خطه وهو في شكل عابد
خرابنا في جهلنا
الحكم الاول بالعماله والعوايد
طريقته في حكمنا
فتح ذراعه للتخلف كان عاضد
شل الخزينه شيخنا
واحنا تركنا نستمع مافي النشايد
تعلن بها شاشاتنا
واليوم ثوره بانصحح وضع بايد
قوموا ندور حقنا
يكفي سكوت نبو على من كان راقد
نلحق بمن قد زلنا
نعمل سوا والحق ما يأتي لقاعد
لو يمتلك وادي بنا
صلاه مني خاتمه للقول قاصد
تغشى محمد سيدنا
..........................
0 تعليقات