يا وحدة الشعب كان الله معش
قالها قبل حرب عام 1994م ...
.....................
يا وحدة الشعب كان الله معش
وادالش العافيه واهلك عداش
الجيش والشعب كله في يدش
والله قادر قوي يدعم قواش
ارجوه غاية رجا لا ضيعش
ولا مفر من طلب منا سواش
والويل كله لذي با يخدعش
با يجعله هو وما يملك فداش
والمشكله لا تندش مقصعش
مقاصعه كلها عتسير بلاش
لكن ما ظن هو عيفلتش
ولا يصدق هوى بعض الكباش
المقصع الجيد هو ما ينتدش
حتى ولو صبحت بعض القراش
لانه ذي طمر لا ساحتش
وكيف لا ما وقع فيه ارتباش
من واجبه لن يخالف مبدأش
ولا يقع في متاهات النقاش
واحنا وربعه نقع غرامتش
وهو مع الحق يبني مستواش
ولا يخلي حدا يتهصمش
ولا تقع وحدته ليله ولاش
ما عزه الا لمن يعتز بش
والقاده الاوفياء يدوا دواش
من اجل كل العرب يمشوا معش
لا وحدوا رأيهم صلوا قفاش
يا من بنيتي لهم مسجد ولش
وامليتي الصوح والجامع فراش
والكل يتوجهوا لا قبلتش
ولا الركن اليماني في قداش
يا وحدة اولاد عمش واخوتش
افلاذ الاكباد هم زادش وماش
با يفعلوا كل شي في صالحش
ما اظن يتحولوا للانتهاش
اصلحهم الله واصلح نيتش
خاصه اذا ساعدوا سود القعاش
ذي ناضلوا واستهلوا وصلتش
ولا معاهم من الدوله معاش
اقول ذي ناضلوا في ذمتش
الان لا تحرميهم من عطاش
سبتمبر المجد يتبع رغبتش
واكتوبر الجيد يسعى في رضاش
هيا ادركي حال شاعر ثورتش
والشعب كله ذي اعلن في ولاش
لانهم ناضلوا في خدمتش
والكل مشتاق منهم في لقاش
والشاعر الحر ظلا يحلمش
ويذبه الشوق لا ما هو يراش
من اجل يايد معالي قادتش
ذي با يجدوا في بناش
الجيد منهم عيرفع راتبش
واهل الحيل والمطامع هم عشاش
يستاهلش من صبر يستاهلش
ومن خدم تربتش يطلع سماش
حب الوطن والمواطن قوتش
والكبرياء والانانيه عماش
يا دولة الوحدة احمد ينصحش
من جور حبش قد السودا فراش
خايف من الكهرباء لا تلذعش
واهل الجشع يقلبوا وجهش قفاش
لكن عظيم الرجاء با يحفظش
ويديم نصرش ويرحم من بزاش
واختم بذكر النبي ذي اسسش
ما الارض تشرب من امزان الطشاش
................
0 تعليقات