ابو حسن قال لا ضاقت دعا ربه
مرسلة الى الشاعر علي احمد ابو هويده ...
.................
ابو حسن قال لا ضاقت دعا ربه
ما اعتاز مخلوق لو هو بالبلاء معصور
يارب يارب خارجنا من الحنبه
واجعل (علي) دوم دايم مبتسم مسرور
يامنزل الغيث ياذي منبت الحبه
انت الذي فاهم اش دي يرطن العصفور
صلوا على من زرع في داخلي حبه
ذي جاهد الكفر ظلا دايما منصور
من بايصلي على طه صفي قلبه
ذي زاح عنا الظلام واستبدله بالنور
ابوحسن قال ماعد اشتي الغربه
تعبت منها وقلبي منها مفطور
يا شوقني شوق شق الصخره الصلبه
شقشق جبال اليمن واتشقشقين الدور
من سامر الخل والا زد رقد جنبه
البعد قد طال لكن سهل انا معذور
لا بد ما افك قيد الغربه الصعبه
محجور ياوقت توقف ضدنا محجور
بالله ياذي معك صالون ابو دبه
تشل شعري وسوه في اليمن منشور
يامن تغرب فهذا الذنب هو ذنبه
لا هو بعاقل ولا صاحي ولا مسحور
يمين لو توصل الاقدام لا الركبه
لا ارجع بلادي وأكل من خيرها الموفور
سقاش يا موطن الاهل والصحبه
محلى هواها النقي او طيرها الشحرور
عيدي هدي كن اني جالس على زربه
ياكم تمنيت وانا ماسك الطابور
اعايد الناس بعد الفرض والخطبه
والا يخزن من المنمول والمطيوى
حسبه علينا امانه انها حسبه
تمن قال راحه في الغربه فهذا زور
واختم صلتي عداد ما زاروا الكعبه
على نبي الهدا صلوا على المذكور
................
قصيدة الشاعر / علي احمد ابو
هويده
جواب على قصيدة الشاعر علي حسين ضروه ..
......................
ما من دعا الله تتجلى له الكربه
ويزيل همه وفي بقعا يقع مستور
ما به من الهم عبد الا واخذ نوبه
ما بين حد همه اثقل كاهله ويجور
يا ابوحسن التجه لله واوثق به
لاما تهنيت في بقعا فعد به حور
اصبر على البعد والهجران ارضى به
لابد ما تجلي الظلمه شعاع النور
ما فايده للاماني بطل الكذبه
والشوق مبلا يزيد النار في التنور
إن عاد لك ياعلي في المملكه رغبه
ولا ضويته تفادى قرحة الصنفور
صنفور ذي لا هني زاده ولا شربه
بعدك ومن غربتك يا ابوحسن مقهور
لا تظلم الخل لو تضوه ولو هربه
افعل كما كنت لا روحت انط السور
ماحد من الغربه املى حقه الزُعبه
احلف لك ايمان فوق المرسله والطور
ياما نصحتك وعد كنته في النوبه
وانته دمك للسعوديه قد دي يفور
دخلت نفسك بنفسك هذه الوسبه
لا تشكي لي من عذابك ياعلي محجور
اتشوف اين الجمالي واتبع دربه
قاته في السوق سعره زين ما دي يبور
ماعد دي يشقا ولا دي يرش بالدبه
الشغل عمال والسمام بالماطور
ما شربه الا مياه الصحه العذبه
اكبرعلى الغربه الا اكبور الف اكبور
لا اسرفت في الرد فانا طالبك طلبه
تضوه بلادك قفا ما تسمع المنشور
واختم بذكر النبي واله مع صحبه
صلاه تغشاه لاما ينفخوا في الصور
..................
