يقول ابو حربي لغبني غبنا
قصيدة تحكي قصة ثوار 11 فبراير عام 2011م ..
.................
يقول ابو حربي لغبني غبنا
من وضع مأساوي وحاله رمه
يا قهر قلبي قهر من ثورتنا
قد نزلت من قدرنا والقيمه
ثرنا وضمينا وما ضمتنا
ولا وصلنا خيرها والنعمه
واليوم بتناقش مع قادتنا
ممكن تفيدوا يالقياده للمه
صحنا وليحنا وللمه ثرنا
وبعضنا ضحى وقدم دمه
ثرنا من اجل العز ليش اهتنا
والعز ما حتى عرفنا طعمه
ثرنا نزيل الظلم ذي عذبنا
واليوم شفنا الظلم حطم رقمه
ثرنا نحاسب من نهب ثروتنا
واليوم شفنا نهب باكبر حجمه
ثرنا نحد الفقر ذي جعجعنا
واليوم شفنا الفقر ساطع نجمه
قلتوا سنبني جيش ذي يحمينا
ونحسن اوضاعه ونرفع دعمه
واحنا رجال الامن بان تهنا
قريب وان اوضاعنا بالقمه
واليوم نشكي من نكد عيشتنا
والفول نفس الفول هو والكدمه
ايش من هدف يا صاحبي حققنا
وايش استفاد الشعب يهل الحكمه
الامن فالت والقضاء فلتنا
والكهرباء خارج نطاق الخدمه
والنهب في الطرقات من يحمينا
والنفط يا اصحاب المعالي ازمه
ايش استفدنا وايش ذي غيرنا
تغييرنا شكلي شربنا سُمه
للديوله والمصلحه قسمنا
قسمة كراسي لعن ابوها قسمه
ومن طلع باكتافنا كلفتنا
اهم شي ريش ولا في همه
لا حقق الثوره ولا مثلنا
باع المبادي والقيم والذمه
ولا قدمنا شبر من بقعتنا
بندوم ونحوس بنفس الديمه
لكن قلبنا الباب حق ديمتنا
وتغير الموال حق النغمه
من قبل قد كان السرق تُسرقنا
بسم الوطن ويكلفتونا بسمه
واليوم قد بعض السرق حقتنا
ذي يسرقوا بالمسبحه والختمه
والختم با اصلي على سيدنا
محمد المختار نور الامه
...............
زودنا
بالقصيدة الاخ الشاعر علي احمد ابو هويده
