بسملت بالله ربي وحده الحارس
ديسمبر 2014م ..
............
بسملت بالله ربي وحده الحارس
رازق عبيده وحاميهم من الوسواس
الحمد له عد ما يتلو له الدارس
ويرتل الكهف ويعوذب برب الناس
من شر حاسد تمنى لليمن ناحس
وظلم ظالم مشى في سرة الاخساس
الوضع محزن وحرك عندي الهاجس
احرر ابيات من العقل الفتى الحساس
في فصل بارد على صنعاء اتى داعس
الكل فيها يراقب كم معه ادحاس
يحك جلده ويتضايق من النامس
ترتج انفه اذا جاها الهوى عطاس
ما هو شي البرد ذي سبب لهم داحس
ولا غلا السعر جرثم شمة الانفاس
البعض ظن السبب حين الزعيم جالس
لا غاب عفاش دقت للمرض أجراس
ويظن الاصلاح هو الحزب متجانس
وان السبب في المشاكل كلها العطاس
اقولكم في الحقيقيه به سبب غاطس
في بحر مخفي والحوثي له الغطاس
كله جراثيم يسبح وسطها الدامس
عميل محتال رفس في اليمن رفاس
اسمى الأمني ملكها الدعم من فارس
قد حط ايران تاجه للشعر والرأس
يا عبدربه صراحه ليش متعامس
ما تظهر الحق وتبطل لك البعساس
الشعب قد شاف وجهك منظره عابس
كأنك اعمى وتمشي بيديك عسعاس
من غير سلطه واصبح منصبك قابس
كرسي مكسر ملكته ضيع المقياس
الجيش تحته كما البيض الذي خايس
قد طاح فوقه وفقس معظمه فقاس
حمى على الجيل ذي يطمح يكن فارس
أصابه القهر من دوله بلا نوماس
الحكم فيها منافق لص متمارس
ما همه الا المناصب تدعم الهلاس
فيه القيادات تتقن مهنة الحابس
من نال منصب تصبح رتبته حباس
كأنه القيد ذي شعب اليمن لابس
ملفوف حوله وسبب للبشر افلاس
يا اهل الزعامه كافيه صفكم خامس
وسط الطوابير نضربها في الاسداس
نصفي الجمع منكم يا حشى تارس
اضعف لنا جيل نشتي نصنعه نبراس
با يشرق الصبح يبرق نوره الشامس
ويظهر الضوء واضح لمعة الاشماس
يتبخر البحر منها غيم متلامس
مع رعوده ويسكب غيث كالآماس
على بلدنا ويروي مزنه اليابس
با نحرث الارض بعده نتقن المغراس
نقلع قياده من الجذر الذي غارس
فينا المفاسد ونترك كثرة الملاس
نتلم بدلها زراعه انشاء متحامّس
محتر حامي ويلذع لذعة البسباس
يحمي بلاده ويعرف ان هو حارس
ارض الكرامه وهو فيها من الاحماس
والختم اصلي على من تذكره أنس
وأرض الحدا كلها صلت في الاعراس
على محمد بشير الخلق ذي طامس
عهد الظلاله وعصر الظلم والأجناس
..............
0 تعليقات