من با يحل المساله والمساله
18 ديسمبر 2014م ..
.............
من با يحل المساله والمساله
تحتاج عقل أنسان يعرف حلها
لا عد تحلوها تعبنا حلحله
أرض اليمن ضاقت وضاقوا أهلها
لا تتعبونا شي صياح وبلبله
كل الحكايه خاربه من أصلها
لا عاد به دوله ولا عد قبيله
قد جاء لها هادي وطعفر شملها
الله يرحم شعبنا ذي حمله
لا هو طرحها لا ولا هو شالها
وأحزابنا ما قصروا بالقلقله
ذي دمرت شعبي بسوء أعمالها
قد شبعوا شعبي قصيد وزومله
ذي مكنوه أحنا لها أحنا لها
أكبر عليه الشعب هذا مخبله
واكبر على دوله قد الله زالها
ضاعت حقوق الشعب هذا بكمله
حتي الخزينه ضيعوا أموالها
كل الدول قد به معاها منزله
فوق القمر تبني لأجل أجيالها
واحنا المواطن ما لقي ذي ياكله
قد حالته مسكين يرثا حالها
من المشاكل ذي علينا حاصله
أرض اليمن ما زد عرفنا مالها
حنيت من قلبي حنين القافله
ذي حملوها حمل فوق أحمالها
حنين خلا كل شامخ يزهله
على اليمن ذي قطعوا أوصالها
عتعقلوا من قبل تصبح صومله
مثل العراق وسوريا وأمثالها
عتعقلوا قبل الندم والبهذله
ياهل اليمن بنسائها ورجالها
هذا كلامي ليت من هو يعقله
أو لا على بعض العقول أقفالها
...............
0 تعليقات