قصيدة الشاعر / امين يحيى احمد عاطف

يا شعبنا الصامت ترى الصمت يذبح

بدع عن اوضاع اليمن هذه الايام .

.............

يا شعبنا الصامت ترى الصمت يذبح

أصحى وفكر بس يكفي رقادي

عقلك مقفل شل مفتاح وافتح

فالوضع ياشعب اليمن غير عادي

ما اظن ياشعبي عتسبر وتنجح

دام أنت في وادي وغيرك بوادي

إلى متى تصمت ورأسك عيقرح

واتحالفوا ضدك جميع الأعادي

أعداك منك فيك والدهر وضح

خمسه رموز الشر خانوا بلادي

القاعده هم والحراك المسلح

والسيد الحوثي وصالح وهادي

...............

قصيدة الشاعر /  عاطف القاضي

جواب على قصيدة الشاعر امين عاطف ..

............

ما خربك يا ارضنا غير الاصلاح

ذي كانهم اكبر بؤر للفسادي

ذي يأمرون الناس بالخير ياصاح

وهم عن التطبيق جمله بعادي

ما هو لهم حلوه مسموح ويبتاح

وما سواه باطل ولو كان قادي

تغييركم بالشر جانا والاجراح

نسيت نفسك حومتك بانتقادي

كان اليمن مجبور والكل مرتاح

والنقد والتغيير والراي عادي

لكن خربتوها بثوره وصياح

تطغوا على الكرسي وزاد التمادي

الكهرباء والامن والنفط قد طاح

زدتو رفعتوا سقفكم والمزادي

وضاع راس المال ما نبغى ارباح

بيد من نزقم وفين الرشادي

لا عاد تصيح ياامين بس صياح

يامن كذب كذبه تعب لو ينادي

.............

قصيدة الشاعر / بشير الجميلي

جواب على قصيدة الشاعر امين عاطف ..

............

قال الجميلي عد ما الرعد يقرح

حيا ابن عاطف ماتذيع الروادي

أمين ذي هو دايما يكتب الصح

صريح في شعره وعنده مبادي

وضع اليمن والله ما عاد يسمح

وفي اليمن للشر عدة ايادي

والشعب كله جالس اعجم ولا افصح

جالس مخزن نوم غادي بغادي

إذا نصحته جد يحسبني امزح

ولا يعي نصحي وكثر انتقادي

وتاركين الظلم يسرح ويمرح

لا ما تدهور وضعنا الاقتصادي

وصمت شعبي ذي دعى الكل يطمح

في بهذلتنا والغلاء والتمادي

كم جهدنا نجمع ونقسم ونطرح

والبنك فاضي والخزينه تنادي

وكل فاسد من شقاء الشعب طحطح

تاجر بقوت الشعب واصبح ريادي

والله من خان الوطن ما عيربح

ولو تولى ألف منصب قيادي

واعداء يمنا كل شي قد توضح

خمسه ذكرتاهم  وباقي أحادي

هو السبب واخطر من الكل واقبح

والسم ذي هد المدن والبوادي

إلحزبيه ذي خلت الشر رجح

والقت بلادي تتشح بالسوادي

من حن أتت ما فاز شعبي ولا افلح

هي اضعفت جيش اليمن واتحادي

هي خلت الشعب اليماني مدردح

وشتتنا واصبح الأمر عادي

في ظلها ما عاد للخير مسرح

صارت قيم شعبي بسوق المزادي

كلين في حزبه يغالي ويشطح

يالعنة الأحزاب كافي اضطهادي

حزبي وطن وامي اليمن هذا الارجح

واحنا الجميع اخوان ضد الأعادي

أرض اليمن من ضيقة احزابي افسح

وابقى لها جندي وبالروح فادي

وديني الإسلام ما غيره امدح

والطائفيه ما لها أي نادي

والوحده اسمى اسم في القلب يطرح

والحل الامثل بالوفاء والودادي

لاجل اليمن با أسامح الكل واصفح

وموقفي عيظل دايم حيادي

جبا لشعبي ورد له شم ينفح

ونلتقي في خير والطير شادي

ختامها صلوا على النور الاوضح

طه محمد خير منقذ وهادي

..............

زودنا بالقصائد الشاعر بشير الجميلي