ياجماهير اليمن قولوا اهلن
...........
ياجماهير اليمن قولوا اهلن
رحبوا بالفوز لاهل الخيانه
رحَبوا حاشد وسنحان تِعلن
مجلس النواب والبرلمانه
وان بدى واحد بكيلي تليقن
يدهنوا وجهه ويسكت لسانه
بالحضاره يايمن عادك استن
عد جواد العز ما اطلق عنانه
طال ما العينين في الشعب تطحن
بان بعد الاتهام الادانه
اجّل الفتره على شان يأمن
والنبي ما عاد لمثلك امانه
يا(جمالي) قد بتولك محصّن
والعجوزه قد معاها حصانه
انتهى المشوار لا عاد تركن
قد فهمنا مذهبك والديانه
قد لك اربعتعش تتعلّم الفن
واكتشفنا سر دار الحضانه
ياوزير البقٌع ياحاكم ابين
ياملك شبوه وسلطان خانه
من قُتل في عهدكم ماعاد يُدفن
واصبحت مسؤليتكم مُدانه
عاشقين في حب ليلى وسوسن
والفلم والدرس والاسطوانه
والاجازه لا فرنسا ولندن
والغرض تتفسّح الخيزرانه
حان وقت التصفيه والجرس رن
يلتعن في المجتمع للهيانه
وانت صح النوم يانايم اذهن
من يُبا الكرسي يسوي ضمانه
يلتزم امن المواطن ويضمن
لليمن بالعدل يرفع كيانه
وان قد الدوله وراثه فعفون
كلمن ياشعب يرجع مكانه
عاد جهد الحُر يضرب ويطعن
لجل تبقى له كرامه مُصانه
للحياه بالذل فالموت اهون
والمعيشه بالمذله جبانه
ذكّروا بالقردعي وابن الاوذن
والزبيري صاحب الهندوانه
نادت الشرير والدرم أذّن
وافطرت ريمه وصامت جحانه
كذب من صلى قفا من قد ادمن
واستغل الماليه والخزانه
واعتماده بالملايين والطن
بايقص النفط والجُب خانه
سافر الملعون جاء الثاني العن
خلّف الملعون بيت اللعانه
من بحق الشعب في الشعب هيمن
فالنهايه قرّبت بالديانه
ووفت الحسبه وميعادها اعلن
وآخر ايامه وتالي زمانه
......
زودنا بالقصيدة مشكورا الاخ محمد حسين صالح صوال
0 تعليقات