دعيتك ياصمد ما اختط بالجاف
6 سبتمبر 2015م بدع مرسلة للشاعر محمد حسين العمري.
.............
دعيتك ياصمد ما اختط بالجاف
وما يكتب بماء الحبر القوافي
وما الذكر ابتدأ بالنون والكاف
وجاء في محكم التنزيل وافي
وفي يوم الخميس ياليت من شاف
شروق الشمس في روس القنافي
مثيل اللول بادي فوق الاكتاف
وهبات النسيم حولي هفافي
انا ابوحوريه با اقول بانصاف
ولي هاجس وبحره عذب صافي
وعشنا في زمن قد باع الاعراف
والاخلاق اصبحت في ضوء خافي
دول مثل القرى والجيد مخلاف
رعاة الشاه ذي كانوا حرافي
تجمع ضدنا شاجع وخواف
وذي يلبس عقالات او كوافي
ومجلس امن لعبه بايد نواف
وسلمان الذي قد كان حافي
كتبت الشعر للتاريخ طواف
ولاجل الطفل ذي ما كان شافي
وشفت الطايرات اشكال واصناف
تدمر للمصانع والمصافي
تهدف في بيوت العز هداف
ولا الطير قد سلم وسط المجافي
بدعت ابيات مني ميش تكلاف
ولا مني تحدي او خلافي
اريد اتنشف القيفان نشاف
من العمري اذا حط المشافي
عليك ياشيخ محمد التلقاف
عليك حط السفن وسط المرافي
كما انته للقوافي بنك صراف
وعندك للادب احلى مضافي
ونظمها درر من لول واصطاف
وما مني نقص حط التوافي
...............
قصيدة الشاعر / محمد حسين العمري
جواب على قصيدة الشاعر جميل حسين أبو حوريه.
............
وصلني بدع شاعر فاق الاوصاف
درر وألماس من شخص احترافي
وقام الهاجس الليله تخطراف
ونضم لي جواب والنور طافي
لزوم الرد عندي حسب الاسلاف
البي من دعاني بالهتافي
ويعجبني القضاء بعد التسلاف
ولا يوم هاجسي جاه انكسافي
وقومي في الحدا شكه فالاطراف
رجال الموت واسباع الفيافي
ولي عرق ارتواء من بحر زغاف
وسط سنحان ما يعرف جفافي
ولي فخر النسب لا حيد الاشراف
رجال العز شيعان القنافي
معي فيها ابزيا واخوال واحلاف
ويفعان المقنف رمز وافي
حلاء
وديانها يجعلني التَّاف
حواليها ويزداد التَّفافي
عشقها خاطري من بين الارياف
وقلبي حبها والحب شافي
مناظر صبحها صورة تلغراف
لها منظر بهذا الارض ما في
اخو شداد قال الوضع شفاف
ومن وضع البلد نومي مجافي
ذكرته لي زمن قد باع الاعراف
وهذا الصدق واضم اعترافي
قبيلي تسمعه وقت التفلساف
ووقت الصدق فالدنيا عوافي
رجال يتوطفوا بالاسم وطاف
وما معهم سوا منها الغلافي
وظنوا القبيله سلعه وخطاف
وخلوها طلب مثل البوافي
الا يا قبيله حني تحساف
على نهج الحضاره والعفافي
رجال القبيله كلين مختاف
وباعوا عزنا لاهل الكوافي
لسلمان انحنوا واهدوا لسياف
رقاب الذل للقوم الضعافي
ومكن ارضنا يا ناس وداف
وانا من فعلهم هذا منافي
زمن غدار خلا شعبي انتاف
وهذه هي من السبع العجافي
كفايه يارجال الدم نزاف
وهبوا وانهضوا ياشعب كافي
بصدري قهر يلهب وسط الاجواف
ولا تقدر تطفيه المطافي
امانه لو عفا شعب اليمن كاف
انا يا ابو جمال ما انا بعافي
ويبشر بالقضاء ما اقبل تئساف
ينال الطعن من حد الرهافي
وراسي عاش ما يعرف تعطاف
وجسمي والجسد بالعز دافي
طول شعري وخير القول قطاف
وحان الان ياخال انصرافي
وفالختم الصلاه ما الموج زغاف
على طه النبي عد القوافي
..............
0 تعليقات