يا مشترك يا مؤتمر
28 سبتمبر 2015م.
...........
يا مشترك يا مؤتمر
الشعب مبلي لا النخر
بيّع حلاله والبقر
ماعد لقى حق الطعام
إلى متى تتخاصموا
متى متى تتفاهموا
وللمواطن ترحموا
وترجعوا عهد السلام
ماذنب شعبي تقتلوه
للمه كذا بتبهذلوه
وتعقدوه وتحطموه
حرام يأخبره حرام
إلى متى هذا الصراع
والدجل هذا والخداع
الشعب قد صابه صداع
منكم وسط قلبه ورام
ماعد لقى من ينصفه
ويعلمه ويثقفه
ويفهمه بالمعرفه
ولا حدا قله تمام
غبني على الشعب الجريح
من يسمعه لما يصيح
بذنوبكم أصبح ذبيح
أصبح ضحيه للصدام
الله لا برى الحزبيين
هم للمواطن مئذيين
وللوطن متصديين
ردوه إلى عهد الامام
هولا سبب من حاصرك
المؤتمر والمشترك
والحوثي الي دمرك
ياموطني خلوك ركام
المؤتمر والحوثيين
هولا مثيل البوذيين
على الوطن متعديين
قد حطموا شعبي حطام
وهل اللحاء واهل الدقن
أهل المصايب والفتن
ابلو بلادي بالمحن
وبالحروب والانقسام
شبو الحرايب والحروب
ذي بالشمال وبالجنوب
عشان يملون الجيوب
والشعب ما بش له اهتمام
وعاد جابوا العاصفه
ضد المواطن تعصفه
وكل منزل تقصفه
هذا من الشعب انتقام
هدوا الطريق والمدرسه
عشان عرش المرائسه
واهل النفاق والقسقسه
يصفقوا لجل النظام
الشعب عايش في وباء
لا غاز ولا عد كهرباء
طول الزمان متعذباء
وطول عمره في ظلام
الحرب لجل الشرعيه
والطائفه والرجعيه
ما الشعب جائز تمحيه
كلام والله ذا كلام
لجل الرائيس تفنى اليمن
ما همهم شأن الوطن
اهم شي عرش الخون
يرجع إليهم بحترام
ولله ما نشتيه رئيس
لو ترجع الجمعه خميس
والبحر يتحول ليسيس
والصقر يتحول نعام
قلنا افهموا ماذا اقل
ماعد نريد ريس كسل
نريد ريس متصل
يمضي بشعبي للامام
لا حوثيه لا حزبيه
ولا طوائف حربيه
ولا مشاكل سلبيه
هل تفهموني ياكرام
عنيتكم جمعه سواء
يافاقدين المحتواء
ياهل الظلاله والغواء
ماتستحقون احترام
وأزكى صلاتي بالاخير
على المشفع والنذير
محمد الهادي البشير
عليه صلاتي والسلام
............
0 تعليقات