قصيدة الشاعر / علي احمد أبو هويده

قال العليي سرجوا لي شمعه

21 نوفمبر 2015 القصيدة موجهة الى الشاعر الكبير محمد عبد الله النصيري (أبو يام).

............

قال العليي سرجوا لي شمعه

قذا سنه والكهربه مقطوعه

اسمر مع الهاجوس ليل الجمعه

وللنصيري انظم المقطوعه

بويام ذي له في القصايد سمعه

في واحة اصحاب الحدا موسوعه

جباه مني الف باقه دفعه

كاذي ومضرب عطر غالي نوعه

كفايته والباقي اهدي ربعه

اهل الذراع الهامه المرفوعه

واقلهم اشفي محمد تبعه

مع علي عفاش في المجموعه

حكايته مجنون حصل ودعه

وقصته قصه قدي مسموعه

اتمردوا ضد الرئيس الصلعه

وادو لنا حزب المجوس الشوعه

ثوّر مع الاثوار بسم الجرعه

واليوم قذا جرعته مرفوعه

البر غالي قيمته من سبعه

من اشترى ولا لحس كرسوعه

والدبه الديزل ثمنها طبعه

واسواقه السوداء اصبحت مشروعه

وجاء يقلي جنب بيته طلعه

ما يعلم ان كوعه ولا اينو بوعه

في فيسبكه بويام شاقي قرعه

عفاش في رده وفي مبدوعه

آح أح ياعين اذرفي بالدمعه

من عيشتش والحاله الموجوعه

صبرش على بختش واخس الجزعه

في ذنب ذي ذماتهم مبيوعه

يا انصار من ما قد ضربتوا ركعه

جزاهم الله ضرب بالمربوعه

ريس مقوت يانصيري بدعه

سوقي وحط ‫‏الزق في طنقوعه

باع الوطن عفاش شلو ضلعه

هو ظني انه قد سبر موضوعه

مهما حلم للديوله والرجعه

قد الثقه منه نعم منزوعه

جيش الوطن والشرعيه في نبعه

قادم لصنعا العاصم الدلوعه

صلوا على احمد يا اصدقائي جمعه

صلاه سنه واجبه مشروعه

............

قصيدة الشاعر / محمد عبد الله صالح النصيري (أبو ثابت)

21 نوفمبر 2015م وهي جواب على قصيدة الشاعر علي احمد أبو هويده.

...........

يا ذا المنيبه يا ملب الفزعه

ذي لا نخت تحمل ثقل وتزوعه

يا الحيد الاحمر يا شموخ القلعه

يا مزبن الخايف قمم مرفوعه

يا حصن شلال الشهامه نبعه

والجود والنوماس من ينبوعه

ضيفي ولب من ربعنا في تضعه

يا يام شوف الضيف سدو جوعه

كنه شبع قام اشتكاء من وجعه

عندي علاج الحاله المصروعه

حالة صرع قال النصيري تبعه

والاخ في نفسه تبع دنبوعه

والداعشي منه ضميره نزعه

اصبح (علي) ضمن الوجيه الشوعه

وجيه سودا ملتحيه بشعه

خارج نطاق النسخه المطبوعه

شريعة الاسلام ماهي شرعه

شريعتك يا داعشي ممنوعه

بعتو وطن لكن سبقت الشفعه

سارت طرقكم كلها مقطوعه

شغلتوا الطيار مريم قرعه

ماشي تركتوا في اليمن صاموعه

احسب خسارة غارتك والطلعه

واعناقكم ذي عندهم مدسوعه

من اجل تحصل يا(علي) ع الطبعه

بيع اليمن بالزهد عندك روعه

يا بوهويده من عجيتوا ضرعه

اهتك جسمه صرت اعد ضلوعه

واتأكدوا يا حبل الاشبط جمعه

اني سلخت الرد عن مبدوعه

والا فبا اباشر (علي) بالصفعه

لاما يبطل داعش الخنتوعه

صليت ما رعده قصف واللمعه

شقت كبدها بالمطر متبوعه

...........