قصيدة الشاعر / محمد عبد الله احمد القوسي (أبو سامي)

لن نخضع ولن نستسلم للصاروخ والطياره

18 نوفمبر 2015.

..........

لن نخضع ولن نستسلم للصاروخ والطياره

احنا يا طريزان ارفع من غاراته الجويه

سلطان الحدا ما يهتز ما دام الحدا انصاره

لو جابوا بوارج عظمى والا قنبله ذريه

ما يهتز دار الرائد لو غرتوا بمليون غاره

اشمخ يا طريزان اشمخ فيك القيوسه مبنيه

لا صاح اللواء التفّت ابطال الحدا واغماره

وان قال اللواء نتقدم بالرشاش والجنبيه

من قمّة طريزان اشّر واحنا با نشُب الناره

قد جيش الحدا متعطش اما موت او حريّه

احنا ذي نرد العاصي واحنا ذي نصح افكاره

احنا لا نوينا ثوره ثورتنا هي الرسميه

احنا لا سندنا كفّه في الميزان هي مسماره

واسأل عننا سبتمبر يعرف لا عقدنا النيّه

يا درع الحدا والقائد جيشك منتظر لاشاره

نتبع أمر ابوعبدالله وقت الحرب والسلميه

وان قال اقبلوا هبينا طوفان الحدا واعصاره

وان قال اوقفوا وقّفنا تحت الامر والطوعيه

جيشك يامحمد جيشك حنشان الظماء وانماره

كمن قرن راسه يابس حط الموت لا كوفيّه

الفرسان ذي تتسابق فوق الخيل في مضماره

ذا رائد وهذا أوّاب أبنائك رجال وفيه

برجك با يضلي شامخ واحنا حارسين إضباره

والله ما تحرك عرشك واحنا القوه البريه

من حبل الزيادي عهداً واخوه البخيتي جاره

والحبل العبيدي جنبك هو ثالث لواء الألويّه

ذي تكسر قرون الغازي حتى ينقطع زنّاره

لا امريكي ولا صهيوني با يحتل منا تيّه

هذا الشعب له تاريخه من اعظم شعوب القاره

رقمه في الحضاره أوّل في تاريخها الانسانيه

من بعد الفراق اتوحد والتمت جميع اشطاره

با يفضل يمنا واحد ما با ترجع الشطريه

لو حاول جميع العالم تركيع اليمن واجباره

ما يخضع ولا يستسلم تبقى قوته محميه

مازال ان رجاله مثلك حراس الوطن واحراره

با تبقى اليمن في عزّه دوماً شامخه وأبيه

ما هم الحصار الجائر مهما طولوا بحصاره

با نزرع ونحصد فيها من خيراتها مكفيه

يا طير احمل البرقيه للشيخ الوفي لا داره

للقوسي محمد توصل من جيش الحدا مهديه

واجمل ما يقول الشاعر في نظمه وفي اشعاره

صلّوا عالنبي يا ساده من صلّى يحب نبيّه

...............