قصيدة الشاعر / وضاح جابر الخلاقي اليافعي

الوحده قضي امرها والميثاق ضاع انتهاء

مرسلة الى الشاعر أبو ذيب الرقيمي مزروع.

............

يا الله بطلبك رحمتك ما غيرك طلبت الرجاء

نفس عن عدن واهلها شفت البحر بالموج هاج

شفت الناس كلاتها الواصل وذي قد اتاء

كلن يطلب الحريه للتحرير سووا احتجاج

قم ذلحين يا مرسلي شل الخط ارض الحدا

وين ابن الرقيمي اسئله قل له شفت ماشي خراج

الوحده قضي امرها والميثاق ضاع انتهاء

والقايد وفخر اليمن ضيع ع اليمن مية تاج

ذي كنتوا تشوفنها رمز العز رمز الوفاء

طاحه من جنوب اليمن ضني من صنعها زجاج

يا بو ذيب ما تنشدك او بطلب قوافي رضاء

شعبي حر صامد ابي ما له شي امور اعوجاج

ذاق المر في وحدته سميتوا عليه الهواء

لكن قلت با ابشرك بان العذب بان الاجاج

واجب يا الفتی قد وجب با اقدم اليك العزاء

عظم ربنا اجركم خذتوا الموت سعر الحراج

ذي ذاقه عدن ظلمكم طيلة قرن حان القضاء

والمظلوم له دعوته تحت العرش سوی ارتجاج

يا بو ذيب صنعاء اليمن ذي كانه بعالي الفضاء

ما الليله ضوی ليلها ذي يسمع يصيبه صناج

راح الحكم ذي سا (علي) ضيع عهدكم والاخاء

ماشي اسسه يا فتی سوی الساس زنجه وعاج

اسمع كلمتي يا فتی عندي وصفها والدواء

ون ماشي رضيتوا بها والله ما تحصل علاج

صنعاء حكمها لهلها يعلوها بوسط السماء

مالي دخل فيها ابد او تسمع لنا انزعاج

وفد العاصمه قد عزم قالو لي ومعهم لقاء

يتفاوض مع احزابكم انقادوا مثيل النعاج

بيساوم بصنعاء اليمن بارخص سعر ماشي حضاء

ذي ما حب سعر الجمل بيرضی بسعر الدجاج

بعد احزيك وانتي افتني من بكره بتشعل لظاء

المظلوم يفرح بها والظالم بعينه عجاج

ما تحبل من العاطفه بل تحبل اذا جاء الشقاء

لا سال الدماء با تضع جابه بنت معها انفراج

بختمها بذكر النبي ذي ذكره بقلبي نقاء

صلوا ع النبي يا اهلها ما كبر من الحج حاج

............

قصيدة الشاعر / أبو ذيب الرقيمي مزروع

جواب على قصيدة الشاعر وضاح جابر الخلاقي اليافعي.

............

بالمليون يا مرحبا ما نجم العلالي بدا

بالضيف المحبب لنا ذي نضج حروفه نضاج

وضاح الخلاقي وفي لكن ما مشى لي قدا

جالس يعصر المعصره حتى اتكسرين الهجاج

رغم ان ابن جابر يهيم يحسبنا الشمال العدا

إلا اني معه مرتكي ما اطفي عليه السراج

كم مره وانا اقولها با نفدي يمنا فدا

والايام تثبت لنا من هو ذي لعب بالمزاج

انته اخ وانا اخوك واليدين تصبح يدا

ما با نطلع الطيرمه الا لا بنينا الدراج

لا ناداك صوت الوطن جاوب دعوته والندا

خل العنصريه بعيد لن العنصريه سماج

ما الوحده عليها خطوط تحميها الدكن والصدا

خط احمر لها مستقيم ما يوجد عليه انعواج

لله الولاء والبراء حتى لو شدا من شدا

والميثاق له قايده قولوا للعيون السواج

فيه الحشد والبيكله تعرف نغمة المبتدا

واصحاب القرون الطوال تدخل في تخوم العجاج

صنعا واختها هي عدن لو يتكشفين الرداء

وان عزيت قبل الوفاه لازم لك تخف الشباج

انتم همكم شرذمه ما تنقاد شي بالهدأ

واحنا همنا شعبنا لا يغرق بعدة مواج

ما فتواك في الحريه والثوره قصيرة مدا

والدوله تبا اعلانها والقبطان تحت السياج

ثوره مخزيه مزريه تتلحف بيوم اسودا

والدوله محال المحال تستقدم عقود الزواج

ما جهدك تقاوم بها من صبح الصباح لا غدا

احنا من صنع مجدها وادينا الرجال الحناج

هي محنه وبا تنتهي والايام تذهب سدا

والخاين من اية جهه تتقلقل لحومه بصاج

واختمها بذكر الشفيع المذكور طاها احمدا

ما العابد لربه سجد وادا للنسك كل حاج

.........

زودنا بالقصيدتين الشاعر أبو ذيب الرقيمي مزروع