يا الله يامن تروي الأرض بالسيل
عام 2014م موجهة الى ولده الذي يدرس في
الهند.
........
يا الله يامن تروي الأرض بالسيل
من بعد ما طالت عليها المحاله
يا سامع الداعين في وهدت الليل
يا حي يا قيوم جلت جلاله
تحفظ لي احمد من ردا الوقت والميل
ارسلته ارض الهند سافر لحاله
أسباب حدتني عليا الغرابيل
العلم نبحث عنه ضد الجهاله
بالحيل يا ظنى القلب بالحيل
والعقل بعدك كن فيني هباله
يا احمد ترى احمالي ثقيلات بالشيل
ما عاد لي في حمل الاثقال حاله
العمر قضيّناه كله عراقيل
ولا ضاع عمرك ما يجي لك بداله
واخوانك ابلوني بلاوي غرابيل
ثلاثه اللي ما عليهم مقاله
صبرت بس الصبر جاوزه بالميل
واختاروا أبواب الهوى والضلاله
وحاولت اجنبهم سفر شارع الريل
وارسلت مرسالي وخان الرساله
الله واحد يا دلة البن والهيل
اللون واحد يا مصفر دلاله
عوضني الله في محمد بحلحيل
دكتور جملني ويا طيب فاله
اتامل الأيام واشوف واخيل
نجاحك اللي مشرفن لي خياله
اوصيك يا احمد لا تروم المهابيل
ولا تسلك دروب الردى والرذاله
جنب عن الشينات واركب على الخيل
العز فيها والفخر والاصاله
للعلم ثابر في نهارك وفي الليل
وانصي المعلم لا تبطل سواله
ربعك على الطولات جيلن ورا جيل
واخوالك اهل الطيب واهل الشكاله
رجال لا جاء وقت علم الرجاجيل
وانعم به احمد لا تمثل بخاله
الله يجملنا لجده كما قيل
ويعيننا نوفي بواجب عياله
يا اخوان شما يا الرجال الحلاحيل
يا خير ميراث العطاء والسلاله
أولاد شعلة عز مثل القناديل
شيوخ وأصحاب السمو والجلاله
..........
0 تعليقات