قصيدة الشاعر / توفيق ناصر الكوماني (أبو ريان)

بسم شعب اليمن ما دام قد وكلونــي

1 أغسطس 2016م بدع مرسلة للشاعر علي احمد أبو هويده.

.........

بسم شعب اليمن ما دام قد وكلونــي

مـن عـدن للمـخـاء للـنـادره لا عبيــده

قال بـن نـاصـر الغـزي غدا تابعـونـي

عبر بث المباشر والصحف والجريـده

حـين اصـفي حساباتي مع خاينـونـي

واجمل العد وافرز في قناة السعيـده

حين احاسب من اتعاون مع غازيوني

خايـن الملـح واللـقـمـه خـيانـه اكيـده

ذي فتـح باب مصـراعـه لهـم يقتلونــي

لازم اقطع له الشريان واقـطع وريـــده

بعد ما ساند القوات ذي حاصـرونــي

لا نجوت ان نجا مني ومن ما اريــده

سهل لا فاتتـك يا هادي انته عيــونـي

سهل لا فاتتك يا حزب فندق حميـده

با نطهر فـلـول الشــر ذي يقــلقـونــي

دوركم بايـجي مضـمـون يابو هويـده

آح مرتاح في بالي وتغمض جفونــي

بعد ما احط قيدي والكلبـشات فيــده

حين اشوفه في المردع يصيح اخرجوني

حـرروني ووجـهـي لاعتـذر فـي قصيـده

فاتتك يا صديقي ليش ما تسمـعـونــي

كم نصحتك ولكن شوف نفسك عنيده

لا تصيـح ولا تـسال لـيـه تسجنـونـي

انت متهوم مـتورط قـضايا عديــده

شوف لا نا مع الحوثي ولا خـامئـونـي

لا ولا ارضا بـمـنـهـجهـم ولا بالعـقيـده

انت من جاب ابو جبريل والزنكـلونـي

وانسـجمته معه ياخي بصوره فريـده

اتفـقـتوا مـع السـيد واكلـتو بـطـونـي

بعـد مشروعكـم قد وضعنا ع الحديده

فـهـمـوني بـربـك والنـبـي فـهـمـونــي

ليش بعد الإخاء جيـتوا بحلـه جـديــده

هو يقول ان قد انته داعشي صوهيوني

وانت قلته مجـوسـي رافـضي با نبيـده

كـيف ذي تـفـعلوا مـا تـقدروا تقنعـونــي

كيف نرضا بكم يا اهل العقول البليـده

انتم اثنينكم يا من هدمـتوا حصونـي

قد عصدتوا حياة الشعب هذا عصيده

.........

قصيدة الشاعر / علي احمد أبو هويده

جواب على قصيدة الشاعر توفيق ناصر الكوماني أبو ريان.

..........

الله الحاد كوماني طلع برشلوني

بدوي الله قد وده يصابح وليده

مثلك وانته وامثالك سنه تحرجوني

ماشيين عكس واحنا الكل ماشين سيده

مثل ذي لا تشلوني ولا تطرحوني

ياحسافه على اصحاب العقول الرشيده

يا غبوني على اصحابي وقومي غبوني

ذي بهم كنت اعدهم للظروف الشديده

خيبوني وخابت من قفاهم ظنوني

باعوا القبيله في السوق بيعة سعيده

واصبحوا في صفوف الخصم والخصم دوني

يوم انا قلت انا فاهم حزواي وجيده

صادرو حلمي الاجمل قفا ما اكلوني

بهذلوا بي وخلوني ضحية مكيده

العجوز الخرف عفاش جاه الجنوني

صار في مذهب الحوثي وفكره وعيده

عبد طايع لخامنئي وحزب المجوني

والمقوت قده شيخه وليه وسيده

انت داري اذا دامت لكم قابلوني

الاماني عليكم ياعزيزي بعيده

ما عليكم ولا تدخلوا في شؤني

ارحلوا يا شوش حزب العقول البليده

............

زودنا بالقصيدتين الشاعر أبو ريان الكوماني