قصيدة الشاعر / عبد الاله سعد الدغري

قال ابن دغري لا حدا يلومه

7 أكتوبر 2016م

................

قال ابن دغري لا حدا يلومه

لا شي خطاء في علم من علومه

ما باقي الا علم كل شومه

عامين لا حاكم ولا حكومه

نشكي لمن؟ قلت الشكى على الله

ابن الصماط واحمد عبيد بن دغر

واحد يعلمنا الصمود والصبر

واخر يجرعنا مرارة الفقر

والمجتمع بين السرير والقبر

ملطوم في الحالين يرحم الله

قد كنت اقل يا شمس لا تغيبي

وكان الاستقرار من نصيبي

وكانت الطبعه ملان جيبي

لا يوم ضاعت هيبة القشيبي

ضاع الوطن كله والشاهد الله

بعد اتفاق السلم و الشراكه

ما بين ذي هانا وذي هناكه

كلا على الثاني رمى شباكه

وبيت النيه على هلاكه

تامروا ذي ما يخافوا الله

وفكر المهدي في طرد هادي

زقل برجله من عدن وغادي

تصرف المسؤول غير عادي

مخالف الاخلاق والمبادي

مش هكذا يا ويلكم من الله

وحن وصل لا منفذ الوديعه

وصورته سودا من الفجيعه

يسعد مساك ياحالي الطبيعه

قل للملك سلمان انا ربيعه

واصبح جوير المستجير بالله

وقبل مانحكم على المواقف

في العاصفه ذي شنها التحالف

ضد اليمن بالنار و القذائف

واستهدف الجهال و المكالف

غاره ورا غاره يا غارة الله

ولاجل نقبل عذر من نحبه

فيما وصل له شعبنا بقربه

ضروري اقبل عذر عبد ربه

ولو قسي قلبه وهان شعبه

من جيز غيره والمسامح الله

عشنا وكم شفنا من العجايب

انتوا تسابقتوا على المناصب

واحنا بنتحارب بلا رواتب

لييش ما قدرتوا العواقب

قد الوطن في وضع يغضب الله

كف عتقع السمره والديك ضايع

واهل السيوله سحبوا الودايع

والمركزي يشحت من الشوارع

من شعب مثله جاوع ابن جاوع

يا ساكنين صنعاء رعاكم الله

حقك عليا يا مليح يا زين

لا الناس ذي يتبرعوا بقرشين

مانا قد اتبرعت لك  بالفين

والجُمل عند الحر مننا دين

لا يوم تلقاني يحلها  الله

اليوم با نقضي على البطاله

جمعه وكلا بايمد شاله

ويوزع القصار من عياله

يتسولوا في الحي بالشواله

هذه السنه فرصه لطلبت الله

وانا نويت اجمع من كل طالب

مبلغ بقدر المبلغ المناسب

لهيئة التدريس حق واجب

وافعل علي صالح علي محاسب

ادوا لنا ادوا  واجركم على الله

اين السماط والمجلس السياسي

ذي حطهم عفاش في الكراسي

يا صالح اذكر لا قد انت ناسي

قطع المرتب مثل قطع راسي

مش هكذا يا ويلكم من الله

والنار شافوها  بجانب الطور

وكلفوا عبد العزيز حبتور

يسير في الظلماء  يولع النور

والتربية تجس بدون دكتور

والخير فيما يستخيره الله

قلوا لنا ذلحين من  نخاطب

منصورهادي في الرياض هارب

والريس السابق عجوز لاغب

والسيد الحوثي إمام غايب

محاكمتهم فعل يرضي الله

لا حد يعارضني ولا يناقش

البنك فلس و المعاش مابش

صورة عنصبح كلنا دواعش

ونعلن الثوره على الحوافش

ونعج صنعاء والمخارج الله

نستجوب القائم على الخزانه

وذي امناهم على الامانه

يتحاكموا بتهمة الخيانه

لا ما يردوا كل شي مكانه

ويتركونا في عناية الله

سميت نفسي شاعر التوافق

وانا لتقدير الكلام واثق

ماشي معي في الشيطنه سوابق

قالوا لي العذال انا منافق

قلنا على الكذاب لعنة الله

.............