قصيدة الشاعر / محمد عبد الله احمد القوسي (أبو سامي)

والصقر في بطن السماء عاش مرتاح

20 نوفمبر 2016م.

.............

شوف الدجاجه فوقها ريش واجناح

تطير لكن الدجاجه دجاجه

والصقر في بطن السماء عاش مرتاح

رافع لراسة خير من كل حاجه

والارض يسكنها ثعابين واشباح

يتبادلوا فيها السواء والعواجه

غابه بها كما مرادع ونطاح

الثعل خاضع والاسد له مزاجه

والصيد من لاحت له الرابضه لاح

وانهو قوي لازم يشل احتياجه

ولو تشوف الديك في الفجر صياح

لابد يدفع للنمر من خراجه

مثل البشر البعض رزقه بالاقداح

وبعضهم رزقه ملان الزجاجه

كم ناس مأكلهم عصاير وتفاح

ولحم مندي ذي يزيد اشتباجه

وناس لقمه يابسه ما يقل اح

بالعز والناموس ملصي سراجه

عايش مقنف ما يحب التبجاح

ولا يحب الفشر واهل الهماجه

يشرب عسل بالعز من روس الاجباح

وبالشرف حامل على الراس تاجه

النفس تشتي قفل واكي ومفتاح

غلق عليها لا تشوف الدهاجه

والبطن قفلها وسمّر للالواح

من غرته بطنه نزل من دراجه

عز النفوس المال ذي يجني ارباح

وبيعها كلين  يعرف خراجه

يا وقت لا تمزح وانا غير مزاح

مالي ارى في الوقت هذا سماجه

خلاص لا عد به سعاده ولا افراح

علم البلاء سابق لعلم الزواجه

سرنا سمك في البحر والبعض تمساح

وناس خلا الذيب يرعى نعاجه

لا قد جوع ياكل ابوهن وشلاح

ينهش لحوم الضأن من دون صاجه

وناس ما بين العواصف والارياح

الشمس ظله والمكيف عجاجه

............