قصيدة الشاعر / محمد علي القوسي (أبو صبري)

ما اقدرت اطنش كما غيري وما طن طن

29 نوفمبر 2016م.

..............

ما اقدرت اطنش كما غيري وما طن طن

شايل همومي كما شايل بلاوي سنينه

ما بين راجي وخايف في مصير اليمن

وبين جرحي وبين آلام قلبي حنينه

وبين همي على أولادي وهم الوطن

وبين ظلمي وقهري صرت مثل الرهينه

وبين جوعي وصبري لانتظار الحسن

وبين فقري على ملكي جريمه مشينه

وبين عطفي ووجداني دفعت الثمن

وبين خوفي فلا يوجد أيادي أمينه

وبين شوقي وآهاتي وغدر الزمن

وبين سجني وسجاني عليه اللعينه

وبين قيدي وفي أسري وانا ذو يزن

وبين الآمال ذي آويتها في الخزينه

وبين ريح الفتن ذي بعثرتني شجن

وبين طوفان متعسي وصول السفينه

وبين حبي لصنعاء والحبيبه عدن

وبين صدي وأبعادي عن أمي ضنينه

وبين صمتي وعزمي لاحتمال المحن

لعل مولد فرج خير اليمن في يدينه

وبين عل أو عسى تخمد جميع الفتن

ويشرق الصبح تتبسم شفاه الحزينه

أناظر الصبح يأتي كل ما الليل جن

أقول يا رب بدل بالعجاف السمينه

شعاري السلم حتى لو يقولوا جبن

جبان في قتل أخي واهلي ولا اسوى عجينه

..............