قصيدة الشاعر / عبد الكريم سعد احمد داعر البخيتي

سلام يا بوحنظله يا صاحب الصوت الجميل

في 27 يناير 2017م مرسلة الى الشاعر أبو حنظلة السوداني.

............

سلام يا بوحنظله يا صاحب الصوت الجميل

من لسن شاعر قالها وانعم بكم بدء القصيد

اطربتنا يا صاحبي صوتك يمثل كل جيل

مثلتنا يا حيد اخوك وارض السعيده بك تشيد

يامن سمع صوتك يشل الصوت شليه بعد شيل

يادان دانه دان يابو حنظله وايش الجديد

من بعدها يا صاحبي قلبي حزين جسمي عليل

علي اليمن واحوالها واوضاع معصوده عصيد

مهد العروبه دُمرت والدم فيها ذي يسيل

حروب من كل الجهات الاربعه ترعد رعيد

الطايفيه اججت فتنه ولصت للفتيل

وكل واحد من جهه يصب للنار الاسيد

الحقد في كل النفوس والغل متغلغل غليل

ما زد درا حالي ولا عد حد من الضيقاء بعيد

انك مع ذا الفرع والا فانت متخاذل عميل

لا زم تحدد موقفك وابقي كما هو لك يريد

ومن خرج للمعركه يرجع علي طقمه قتيل

ويا المجنه رحبي والحور حقك يا الشهيد

سني وشيعي قاعدي وداعش اقبل بالصميل

مسكين هذا الشعب كم جهده قده مثل البليد

فك ارتباط الشعب صبّح قاب قوسين او قليل

مادام ابو حركوش متربص لثورات العبيد

لكن حلم ابليس في الجنه يقولوا مستحيل

قال المثل يا حركشي بعض الاماني ما تفيد

واهوال في الواقع حقايق فوق ما انته با تخيل

كم من حرامي لص لابس رتبته مشرف عقيد

والجوع يا ابو حنظله والفقر ماشي له مثيل

بعض الاسر تقتات من برميل فالشارع حديد

البنك فنش من يبى راتب يبكر لا السحيل

يمسك لطابور الصباح يصرخ علي باب البريد

وجيش هادي له سنه حانب ولا اقلا للنقيل

ما يوصل الا بعدما سكان صنعاء كالوقيد

مشوار يابو حنظله عاده علي ما اظن طويل

كل الشواهد ذي تقل الله يعيدك كل عيد

صغت القوافي يا فتي والحر دومآ ما يميل

والرد من عندك كما احنا نعرفك رجال جيد

نشتي نعيد المجد يا بوحنظله وانت الدليل

سبتمبر الاحرار واكتوبر ومايونا المجيد

............