قصيدة الشاعر / علي عبد الله القطراني (أبو حمد)

يا دار لي أحباب حلّو بعلياك

.............

يا دار لي أحباب حلّو بعلياك

يا دار ويلك يوم هم يسكنونك

ولي بهم ذكرى داخل زواياك

من بعد هجري ليتهم يهجرونك

لا عاد تتستر بهم في خباياك

ما غير تتعذب وتحرق شجونك

سمعت صوته قال برّك مطاياك

واطلب مطاليبك وابشر بعونك

فقلت مالي حاجتاً في عطاياك

الله لقلبي من عواقب سجونك

قالت هجرتاني وتابعت دنياك

لاقيت لك غيري من يسعدونك

فقلت له زادت علينا شظاياك

وكثفت ضرباتك وجربت هونك

ورغم هذا ما تصفّت نواياك

وصدقت يا مغرور من يعذلونك

وعن حبنا تشهد حتى مراياك

وتشهد علينا بالمحبه جفونك

رسمت في بطن السحابه محيّاك

وبنيت في صحراء فؤادي حصونك

ووصيت قلبي كلما جيت حيّاك

وهو المعنى بك ولازم يصونك

ومن يوم ساقتني المقادير وايّاك

ولا قدرت انسى عذوبة لحونك

يامن بياض الثلج يشبه ثناياك

وعيون بنت الحور تشبه عيونك

عيدي وميلادي وسعدي بلقياك

واكبر عذابي يوم اعيشه بدونك

واليوم ضاعت ياحبيبي مزاياك

وجفّت ينابيعك وذبلت غصونك

خلاص يكفي لاتحرّك سراياك

خلّك على صمتك وتابع سكونك

ما عاد حاجه نتعب القلب شيّاك

عندي شئوني وانت تابع شئونك

سُمّك قوي ما اظن يذهب برقياك

أفضل علاجي ما أتابع جنونك

.............