قصيدة الشاعر / احمد القعشمي (أبو سراج)

لا يا حروف الشوق واللهفه وكلمات الوله

14 يونيو 2017م.

...........

لا يا حروف الشوق واللهفه وكلمات الوله

ومفردات الحب واهله والمحبه وأهلها

ما كان له قدره يصل قلبي ولا با يوصله

انا الذي شرعت له بيبان قلبي كلها

وقلت له خذ من حنايا قلبي اللي قلت له

لكن اخذ قلبي وشله والحنايا شلها

وعاد يتمهزل بقلبي والحنايا مهزله

كنه ملك نفسه وسيدها وانا عبدا لها

وكلما حاولت ارده يفتعل لي مشكله

احلها واشوف جوهرها ينافي شكلها

تعبت اقله شي بنقبل به وشي ما نقبله

هذه تعداها وطوفها وهذه زلها

حتى تجاهلني بشي ما هو بلازم يجهله

وتجاهل اشياء كان ما هو بالضروره جهلها

كأنه آخذ زود حبي له حكاية مسأله

يصعب عليا فك شفرتها ويصعب حلها

والمسأله لو ودي اعمل مثل ما هو يعمله

بعمل معاه اكثر من اعماله وبعمل مثلها

اذا نسي اصل الحقيقه وانكر اول مرجله

انا اعتبر ان الحقيقه ما بقت من اصلها

واعد واحسب اول الشي ما حصل من اوله

واتنكره وانكر مراحل عشرته وآملها

وآشل قلبه غصب عن حاني ضلوعه واشغله

واغزي حنايا قلبه اللي داخله واحتلها

وأعيد قلبي والحنايا لا محله واغسله

وامحي اثر يدينه اللي ما يفكر غسلها

.............