قصيدة الشاعر / شاكر حفظ الله احمد القطراني

اخو جبر ثالث يوم ملعون ذي رقد

28 يوليو 2017م موجهه إلي الشاعر القدير الاخ /علي عبدالله صالح القطراني ابوحمد

............

اخو جبر ثالث يوم ملعون ذي رقد

وعاد السهر بادع لها عاد انا وعاد

تضيف ثلاث ايام جمعه سبت حد

وعاده مريع للسخونه له الزواد

قدوا حظنا زدنا لطمنا بضيف اشد

له اسبوع يتشرط بياضه قلم مداد

ودخله وخرجه لددوني لهم لدد

وللان مضرب قاطع الاكل والرقاد

وعاتبت نفسي قبل ما تطلب المدد

زمان البلاء نساني اصحابي الجياد

يقول الفتى من يشتي العزه اجتهد

ثمار الصحب يبني لها بنك واعتماد

رسول السلامه شل خطي لبو حمد

اعز القبايل راس عولة بني زياد

زنادي ولحمة ساعدي روحي الجسد

وله قدر عندي مثل عبده شرف فؤاد

علي نوع نادر مثل بسكوت ابو ولد

مسيطر على ماري وبهجه وسندباد

ونبراس في الشعر الحميني بلا حسد

وثالث رقم بعد البردون والسواد

جبا صاحبي مني هدايا بلا سند

عطورات من باريس تصدير بالمزاد

وجبتكم اسطنبول كالونيه وند

بضاعه ثمينه صوروا عرضها مراد

وبعد الجبأ يا مكرم الضيف لا وفد

تقصى الحقايق قبل ما يصلب الفراد

ترا أبو محافظ ما شكا وجعته لحد

تحمل صبر قاوم كثر باطله وزاد

برفسور علم الطب ذبتني القهد

وكم يا قلوب اتذبذبت واصبحت رماد

حنيني على شعب اليمن جد ما وجد

وكافح وناضل ما وصل شي لما اراد

تحدى الطواير وانتصر حسبما اعتقد

وثالث سنه متحمل الحزن والحداد

وكم يا بواطل باطله مالها عدد

غلط في غلط من ذي خسر من ذي استفاد

هو الشعب ذي قاوم هو الشعب ذي شرد

هو الشعب ذي داخل وذي خارج البلاد

سوا ذي استنجد وذي حاكم البلد

بني عم واخوه قوم صالح وقوم عاد

وسيدي وعيني ما يقصر قد استعد

يشل الرواتب ينهي الظلم والفساد

مواطن موظف شيخ ضابط ومستجد

ولا فلس مكنتوني الجبهه الجهاد

ومجهود حربي من معي قال ابوا اسد

أبو خمس ابو الف المهم اجوع العباد

فلا ماتت امريكا ولا اسلمتوا العند

ولا سلمت اسرائيل من يهودة نجاد

ولا آمن لا استقرار يا فقر يعتمد

طحسنا وحمي لا مسبي ولا الجراد

فيا للأسف عيشتوا الشعب في نكد

وضيعتوا الوحده وسببتوا اتحاد

والاحزاب ما حد فيهم اوفاء بما وعد

ولا خير فيهم حقد غل افترا عناد

وشعب اليمن قابل ذي اصلح وذي فسد

ومتحمل المأساه والهجر والبعاد

وبر الامان انما قربنا له ابتعد

وقال اليمن لازال في خانة الاحاد

انا كدي العيشه تعبنا شقا وكد

وما كودي ارسل غاز ديزل ذرى سماد

مصايب غلا ماشي معاش العمل برد

وكمن غبي في مترسه ضاغط الزناد

علينا بشرع الله نحكم بما ورد

وسنة نبيه لا عقيده ولا اعتقاد

نعامل ونتعامل سوا من زرع حصد

ونحكم علي البطال والشوم بالشداد

ويمسح زعيم المؤتمر كل ما رصد

ويتسامح الحوثي والاصلاح والرشاد

بهذه الطريقه يسعد الشعب للابد

ويرجع زمان الطيب والحب والوداد

اخيرآ تحيه صافحونا يدآ بيد

ولا شي قصر فالمعذره عاد انا جواد

صلاتي علي المختار ما ينزل البرد

علي المصطفي ذي حارب الظلم والفساد

.............