صبرك على الغربه وانا صبري على
6 سبتمبر 2017م المعاش والغربة.
..............
صبرك على الغربه وانا صبري على
قلي وذلي وانتظاري للمعاش
فلا ولو تتعب في الغربه فلا
نص المرتب خير من جلسه بلاش
لا با يقع لك الف في شهرك حلا
با تصرفه بأقل شي خمسه كباش
ما في اليمن ما با تحصلها ولا
في النيس والمطرح يقع عشرين كاش
وذي تمر اشهر وهو جالس جلا
قد بعضهم باع المداكي والفراش
اما السرق من سعدهم لاشي غلا
في اليوم والليله يعبوها خباش
ونهب واضح يسمعه كل الملا
حازو علي نهضه قويه وانتعاش
لكن بدعوا الحرب قد قلنا فلا
السمن معهم واللبن واحنا الرواش
لجل الوطن ما قرروا قلنا هلا
وذي نصفق عاش أبو جبريل عاش
وعاش قايدنا علي ذيب الخلاء
عنده صواريخ العدا مثل الطماش
واهم شي نصمد نكل ولا فلا
والجيش نصه والربع يخدم بلاش
ما با نخلي داعشي يدخل ولا
لو يطحنوا صنعا مع قمة براش
لو حاصرونا عشرما نتحلحلا
لا ما الرعيه ينتهوا هم والقراش
وانت اغترب واصبر علي عمك فلا
ولاتكن تدخل مع حد في نقاش
هي هكذا الدنيا قفا الضيق السلا
وكم مواقف ذي تقع عيبه ولاش
ما احنا قداعلنا برانا والولاء
للسيد القايد ومن ما عاش عاش
وكل يوم نصرخ معاهم بالدلا
يا امريك يا إسرائيل جاش الموت جاش
صلوا علي من لا نبي بعده ولا
عداد ما تنزل هماليل الطشاش
...............
0 تعليقات