قصيدة الشاعر / محمد القطراني

بسمك يا عظيم الرجاء خالق كل شي من عدم

14 مارس 2018 بدع مرسلة للشاعر محمد علي الميثالي أبو فايز.

..............

بسمك يا عظيم الرجاء خالق كل شي من عدم

يا رازق ويا مكتفل جنبنا الطريق الرذيل

واصلي علا المصطفى ذي ذكره دوا للسقم

ذي مايسمع اسمه وما صلى به يسمى بخيل

جنح الليل يا مرسلي ما هاجوس شعري نظم

برقيه تصل عاجله شد العزم دربك طويل

لاعند الذي رايته بيضاء ذي ترفرف علم

نبع الجود ساس الكرم ماشي في كرمهم مثيل

ميثالي عريق النسب داره عامره بالكرم

موت أحمر علا خصمهم يرجع كل طاغي ذليل

بو فايز محمد علي نبع المعرفه والشيم

ذي له وسط قلبي مكان وابياته وشعره جزيل

لك مني سلام الوفاء ما خطوا بسن القلم

مرفق بالتحايا يصل ماهب النسيم العليل

والكاذي وزين البخور مني مفرزه بالرقم

خصيتك بها معتني مختومه بختم الوكيل

واسمح لي معاي اسئله وانته جيب قلي نعم

عن شعب اليمن لامتى ذا قاتل وهذا قتيل

العالم كم اتقدمت واحنا جهلنا كم هدم

والساسات راس السبب ذي بالشر كلن يكيل

ماعد حد وسط شعبنا عايش في حياته سلم

قد لا كل بيت اصلو صوت الناعيه والعويل

هل عد شي معانا أمل يبرى جرحنا والألم

أولا هو قدو حظنا ملبوجين تحت الصميل

لا الحوثي اخذها وتم أو هادي في أمره حسم

أو بالميج ذي حومت تووقف ضرب فينا ثقيل

والأسعار كم ترتفع يا كم يا مواطن وكم

والحوثي حجر عاثره مطروحه سفال النقيل

الحوثي شبيه البسوس في حقده وغله زعم

لجل الناقه الجاربه أغتالوا كليب النبيل

قلي لا متى لا متى من يوصل قدانا دكم

من عاده يظن اليمن با يرقى فذا مستحيل

يوم الشر ذي جالنا يوم ثوره وثور ألتطم

في الساحات وسط الخيٌم ملقى العاشقه والخليل

كان الأمن سايد بنا والإنجاز واقسم قسم

إني ماعرفت الهموم إلا في ربيع الرحيل

والغربه نكال النكال يابوفايز المحترم

ماعد شي بها فايده ذي خارج وعند الكفيل

والأوضاع ما اتحسنت في شعبي وأنا اضن لم

تتحسن وعاد اليمن أعداه ماشفون الغليل

يارباه يامعتلي انت الحكم وانت الحكمٌ

خارج شعبنا من بلاه وارشدنا الطريق السهيل

زد سلم علا أبو علي قله يوم أروح الحرم

بادعي له كريم العطاء يجعل كل شي له جميل

قل له والزواجه فلا ماهو عيب يمكن ندم

هو بايعرف اش أقصده وايشو مقصدي والغزيل

تمتم هاجسي بالحروف ذي قد صغتها لك وتم

وانت ارسل جوابك بريد ولا عبر صوت الهديل

واختمها بذكر النبي مايبرق ورعده زجم

عند الله يشفع لنا يوم الحشر يومه طويل

............

قصيدة الشاعر / محمد علي الميثالي (أبو فايز)

جواب على قصيدة الشاعر محمد القطراني.

.............

يا هاجوس شعري تعال جيب الحرف من كل يم

واستخرج لي القافيه روعه عذبها سلسبيل

بكتب لك جوابي أوان في لحظة وجود الزخم

من بعد السباق الذي منه صرت انا مستقيل

جيتك من قمم نايفة ضركام الزبين الأصم

وارجوا منّك المعذره في تأخير ردك قليل

يا حّيا ويا مرحبا ما رعد السحايب دكم

ترحيب الوفاء توصلك تنزل سيل من بعد سيل

بو مارب لك العافيه يا الشهم النبيل الأشم

فيما صدّره هاجسك من ديوانك المستطيل

انته درع بالطارفه لا صبّت رصاصه حمم

قطراني وحصنه منيع لا قد شبّ نار الفتيل

شامخ يا صديق الوفاء متعلي بروس القمم

رمز العز والنومسه متعدي شموخ النخيل

مرسولك وصل مجلسي ضيّفته وهو منسجم

والآن با يجيك الجواب يا مرسول شد الرحيل

بعد البدع يا صاحبي بعطيك الجواب الأهم

حسب الوضع با اصارحك وارفق بالجواب الدليل

ليتك تنظر اوضاعنا الشعب الأصيل انقسم

واحد يطعنه من وراه طعنه مثل خدر الدريل

والثاني دخل مغتصب ما يعرف صلات الرحم

أجبرها وهي رافضه لكن ما معاها سبيل

ما زدنا عرفنا الغريم ذي زيد عليها الورم

فيروسات متأصله مخلوطين نفس الفصيل

محنا قد رجعنا ورا ما زدنا طلعنا قدم

والأحوال متدهوره ما بش غير هذا بديل

يا غبني على موطني في لحظه خرب وانهدم

كلن يشتي المصلحه حتى لو هو اكبر عميل

لا بترول لا كهربا والغاز المسال انعدم

والديزل غلي واختفى والأسعار تشعل شعيل

والغربه عليكم نصيب كم غيرك يعاني وكم

إن شي منها فايده والا بادروا بالرحيل

وابشر قد سلامك وصل والمقصود جاء واستلم

صالح صاحبي والرفيق ما مثله بشر مستحيل

اما مقصدك بالزواج مالي دخل بالمتهم

هذه من خصوصيتك مانا صهر والا عديل

هذا هو جوابي لكم ذي قد هاجسي به نظم

كانوا وعد واوفيت به لا ترسل علينا وكيل

فـِ الختم الصلاه للنبي ذي قد حل وسط الحرم

ما برق الغمايم لما ذي ماشي لحبّه مثيل

.................

زودنا بالقصيدتين الشاعر أبو فايز الميثالي