قصيدة الشاعر / عرفات عبد الله مجور

اليوم يا شعب لا تزبط ولا تردع

11 مايو 2018م.

............

اليوم يا شعب لا تزبط ولا تردع

الى هنا بس هون خفف السرعه

اين انت سارح بروحك يا خبير ارجع

جسمك مدرفل وشكلك يدّي الفجعه

وابصر الى صورتك من شكلها تدمع

عيون جبار ذي ما تعرف الدمعه

قد حالتك حالة البوري صدل واصرع

حارق مدقّل فقير انقر غبي شنعه

فكيف يا شعب عادك للمحن تتطمع

الان جاوب وهب الفزعه الفزعه

بيع الجرامل حذاري صوتها يلمع

ثم اشتره دفترك والحبر والشمعه

واسمر مع بن مجوّر للكلام اسمع

جوهر كلامه تعلم واغتنم سجعه

مزاجه اليوم من جبح الأدب يقطع

مخازن النحل قرص الشعر خذ قطعه

طب المشاكل حروفه خذ بها واشرع

مجرّبه من زهور العمق لك نفعه

فيه الشفاء للعلل معموق واتجرّع

ما دمت بين الجرع جرعه قفا جرعه

حراف بالخط شي منزل وشي مطلع

سربوت عاطل مصوّع من مشى صفعه

بحرب، واشكاليه من " قبهّا " تصرع

دماغ طحطوح يلقى منها صرعه

وفوق عاد شفتك لا اصبعك ترفع

برمز سبعه على المفروض والبدعه

بالنصر والا الشهاده لو تضيف اربع

انك بلا يدْ لا خمسه ولا سبعه

محبوط عمل جاهل الاهداف تتسعسع

لا شغل، لا مشغله، يا بوه و الطبعه !

وصلت لا وضع من جحر المحن ترضع

سموم سلطه يعاني شعبها نزعه

فمن نطق بالمعاش فعلت ببوه اخفع

يصمت بطابوره الخامس على جوعه

فما لبعض المشاكل حين تتوسع

الا الوخايم ولا تلقى لها شفعه

ومن يقول ان صوت اللغم والمدفع

فيه السلاء فيه ترخص قيمة السلعه

يمين ما بالمعارك خير يتفرّع

بالذات لاهي لجمع المال مندلعه

تراكمت فوقك الويلات يا مرفع

بضربة الخيزران والسوط واليرعه

سلمان يرجم وبوتن بالرصاص يفرع

وثعلب الكهف يقوع بينهم قوعه

ويقمع الناس ذا يقتل و ذا يلذع

ب اهداف عمياء تخضب جن مصترعه

وابليس يفتي من المغرب بصوت اشوع

عـ ـدهم بخير بس باقي للبنى طلعه

مهووس بالحرب رغم الجوع ذي مدقع

وأنت مغرم بصوت الطاس والبرعه

يفرحوك بالكنيد الطول كي تزقع

تمسي بها مثل الاعمى ذي لقي ودعه

في بلدتك بالجعب تحكم وتتخلفع

ولا استحيت حن تعنطط ايها البجعه

كيف با تحل المشاكل وانت دب ادبع

ذي للإجر والمصالح تربش القرعه

يا شعب ما احد يشطط بعدما يرقع

ثوبه ولو زجزجه ب اربع مية رقعه

ولا يخيط قميصه قبل ما يذرع

جسمه على الثوب طول الوار في وسعه

فمن يشارك مقص الجهل ذي بَقوَع

قماش بقعاء ولا خلّى بها بقعه

يذوق برد البراري بردها يسقع

ويكون ضره اشد اضرام من نفعه

فلا غباء الحوثيه ينفع  ولا مقصع

يرقع ولا هادي الطامح الى الرجعه

ولا علي محسن الاحمر ولا القوقع

عُبّاد الاصنام يهدوا للوطن شرعه

فالبعض للمال والمنصب بيتقردع

والبعض لا شك فيهم والله النزعه

والبعض ما هو بداوي ركعتك يـ اخجع

سني وشيعي وكم من مطوعي خجعه

أذّن وصلّه صلاتك فرضها واجمع

مغرب مع الظهر عادي هكذا دفعه !

دون البخاري ومسلم واترك الاقرع

ولخص الدين حتى في ربع ركعه !

وضم سربل وقنبس، ما يهم، اوقع

رجال للحرية امضي بها و اسعه

من دونها قف مكانك وانتبه تخضع

وش فايده يا بطل حين تحنب الضفعه

ناضل لنيل العلالي بالثقه واتبع

سبتمبر المجد تروي للكبد زرعه

بالله ثم الوطن مفروض لك تمنع

طاغوت جبار حطم للوطن درعه

لكلمة الكذب فرسان الوغا تخلع

بوثبة السمهري من يرتدي خدعه

مهما نوى الضيم في شعب اليمن يخدع

ما خاب رامي ولو طاحت به القلعه

بالسلم والعلم سلسلها ولا تركع

حتى ولو جف حبر النسخ والرقعه

.............