قصيدة الشاعر / احمد عبده بيضان

بدعت قولي وانا بالله متوكل

مرسله للشاعر صالح مقبل السوادي.

.............

بدعت قولي وانا بالله متوكل

كافي جميع الخلايق فاهم احوالي

ولا كل الزاد الا بعد ما بسمل

بسم الذي مطلع في ساير اعمالي

واتحمده عد ما مزن السماء يهمل

واثني له الحمد في حلي وترحالي

واستغفره عد ماشنت وما هلل

واتوسله لا يعاقبني على افعالي

ابو علي قال لو ماشي معايا ارجل

لا يمكن اصبر على قهري وزعالي

عتعترض لجنة التقسيم لا تكمل

مشوارها او عسى تتحقق آمالي

واناشد المؤتمر في حقنا يعدل

واكتب شكيه وارسلها مع الدالي

حلفت واقسمت ما احول ولا بدل

لو بدلوني بقرصي الف نطالي

ما هكذا يابو احمد يشربين البل

احنا الرعيه وانت الحاكم الوالي

حافظ على القاعده والسقف لا ينطل

تفقد الوضع دور العالي العالي

وذي طلع بالوساطه رجعه يبتل

ولييش خليتني قريت جهالي

ومن اكل حق غيره عقله يعقل

هذه حقوقي وهذا المال من مالي

كيف عتسووا بنا والخل جنب الخل

قدو علينا قد احنا لي بلا بالي

يا مرسلي شل هذه الخطه استعجل

من عندنا وصله للصاحب الغالي

سلم لصالح خطابي بعد ما تدخل

في منزله ذي يحيي كل وصالي

سلم على ذي معانا دايما يبذل

مجهود ما ينقطع معدوم الامثالي

قله يفكر معانا قبل ما يدخل

ان قد فهم مقصدي والا توصا لي

يا صالح انت الأمين العام والقنصل

كرس جهودك وخفف عني أثقالي

قل لابن الاعروش امانه يطرح المغزل

نصيحتي له يخليني على اسآلي

من اب لو ينقلوني مستحيل انقل

ابعد من الشمس طلاعي ونزالي

ضلالها جنتي والظل حيث الظل

وحولها عاد انا مديت طربالي

ولييش عيجمعونا لا ذمار الكل

اوبه لنفسي اولا اشاهد اهوالي

والقتل وسط المدينه من قتل يقتل

ومعظم اسواقها شيكي ودروالي

كيف عتقع خاتمتنا يا ولد مقبل

قد كل واحد معه عشرين فلالي

انته من اهل البلد وانا من المنزل

انته معك ميم ون وانا معي آلي

من عيكون يا ضياء ما بيننا يفصل

والمحكمه فاعله ميزان سركالي

والأمن رافع شعاره شل يابي شل

وعاصي امه يسير الحبس طوالي

لو هي سوا لا نصابح كلنا نزمل

وبالصداقه عترضا لك وترضا لي

نسق مع اصحاب عتمه واهل باب الهل

احنا معاكم اذا قد سدو اخوالي

ذكرت ذي كان فيني دانهم يهجل

ما ينكر الجيد الا انسان خبالي

اعتز بالكل لا قصر ولا طول

والقافله ما تسير إلا بجمالي

يستاهل البرد ذي ما عطف الكمبل

ولا درا كيف طعم المر والحالي

صلوا على المصطفى ما طايره يزجل

وما نزل من شعابه كل مسيالي

..............

زودنا بالقصيدة الأخ فاروق علي زياد