با افك لي دكان جنب الوصابي
3 يوليو 2019م.
...............
با افك لي دكان جنب الوصابي
ادرّس القران واعالج اسحار
ومن تجنن يكتوي ﻻ حسابي
واﻻ نشغل له قصيدة ومزمار
يدوا لي الفتحة وانا افتح كتابي
واشوف ذي به عين واكويه بالنار
شغلة شريفة ما تنقص جنابي
اسهل لنا من شغل تنظيم الاحرار
واعيش جنب الحيط يا امه ويابي
سقى الله ايام الزبيري ونصار
اهم شي زادي ومصدر شرابي
ما همنا في حرب مسلم وكفار
واليونسيف اوفت بعين الصوابي
ترسل لنا بالقمح من حيث تختار
منظمة تنظيم مشرف رقابي
اللي معه صرفين يصرف له انذار
من اعجبه واﻻ فياكل جنابي
كُثر الشحاته هي على شعبنا عار
قد سارت ايام الحلى والروابي
والجبن والزيتون في صحن الافطار
ما اليوم مثل المصرية يا خرابي
حارق وخارق في اﻻغاني والاشعار
.............
){kind=link}
0 تعليقات