قصيدة الشاعر / عبد الله عبده التام

يقول التام ما هو في صحيبه راضي الشومه

بدع مرسلة للشاعر امين عاطف

..................

يقول التام ما هو في صحيبه راضي الشومه

ولــو حــدّه كــلام الـنـاس مــن خـلفه وقـدامه

ولابــدّيـه مـهـمـا حــاولـت تـغـريـني الـسـومـه

انـــا مــن ذي نـوايـاهم لـخـد الـشـر لـطـامه

فـما بـالك شـقيق الـروح اسـيبه والـنبي لومه

وخـيـبه بـايـحاسبني عـلـيها الـجـيل وازلامــه

وعـاطـف هــو قـبـيلي حــر مـا يحتاج تـلقومه

مـلقم مـن اسـاسه واعـرف انـه فالادب هامه

حـسـافه مـا تصورت إن انـا فـي يـوم بـالومه

اســد لاكــن ابـى الّا يـكون الـحيّه الـسامه

لـذا جـيتك وفــاء رغـم أن جـوفي نـار مضرومه

ارجـّع صـاحبي لا قـد بـدا يـخرج مـن اتلامه

نـلّـف ادبـارهـا مـادامـت الـهـيجان مـخطومه

ونـنقذ مـن وقـع مـن قـبل مـا تطويهم الطامه

تـلاقي كـل غـصبا فـي عـيون الـتام مهكومه

ولاكـــن بـالـوفا قـلـنا يـحـدد كــل مــن زامــه

عـجيبه حين ارا البيزان تتصارع على البومه

وصاروا تحت رحمة عين ذي في خدها شامه

مـصيبه يا رفيقي حين اشوف الروس مغرومه

تـمـكنهم رفــع شـانـك وذيــك عـاشـت ايـامـه

غـلـط بــس الـغـلط لا زاد هــو يـرجع ع قـومه

ومــن بـعد الـغلط مـن قـام والا طـول لا قـامه

تـجـاروا بـالحلا والـشر عـندك قـص خـرطومه

انـا ذي مـنع مـنله عـلم تـشفي قلبي اعلامه

ومـفـتـاح الـمـغـدي كـلـما راحــت عـلـيه نـومـه

عـفـيته واصـطـفيته لــن هــو مـعـهد وعـلامـه

.............

قصيدة الشاعر / امين عاطف

جواب على قصيدة الشاعر عبد الله عبده التام

.............

هلا بالتام يرحب من وصل ببيات منظومه

هلا يا ضيفنا والضيف عندي واجب إكرامه

هلا قال ابن عاطف جيتني بايام منعومه

وانا ارتاح للصديق والخصم لا جاني على اقدامه

قوافيك اعجبتني بس انا ما شفت معلومه

تخلي هاجسي يا ابن الحدا ينزف من أقلامه

ولكن شل مني قافية زينه ومطعومه

تخلي من سمعها يبصر العفروت قدامه

تقلي عن شقيقك ويش صابه وايشي إعلومه

وتنشدني عليه خليتني في وسط دوامه

اخوك شاعر مثيلك ليش نفسك فيه مهمومه

ولاحد ضدكم فاحنا الجميع اخوه وغرامه

ولد عاطف معاكم يلقي الشاجع يبول قومه

وشعري سهم يدخل للعدو لا وسط صمامه

انا معروف يا ابن التام والغلطان با الومه

ومن يمشي سواء له قدر في قلبي مية قامه

بحور الشعر لؤلؤ والبرك والوحل جرثومه

وعاطف بحر صافي طيبته من طيبة الخامه

أجاري من يجاريني بإسمي وأحترم قومه

مجاراة النوابغ واصبعي يطرح له إبهامه

قوانيني صريحه واضحه فالشعر مرقومه

ومن خالف قوانين القوافي ضاعت أرقامه

تحياتي لكم والجيد ما يرجف من الغومه

ومن غامر وهو واثق بنفسه يوصل احلامه

واذي ما قد عرفني يا صديقي با يجي يومه

ولاحد منقذه من قبضتي في ساعة إعدامه

................

زودنا بالقصيدتين الشاعر سيلان البشاري