قصيدة الشاعر / عبد الله عبده التام

يا ذي على ضـفّـة الـمـعنى سـمّـيتك البركل الـساكب

بدع في تاريخ 18 فبراير 2020م موجهة للشاعر مفتاح الاسرب المغدي

....................

يا ذي على ضـفّـة الـمـعنى سـمّـيتك البركل الـساكب

ذي مص صحن العـسل كُـلّـه وش عـاد خلّيت للنّوبه

اياك ويّـاك حذّرتــك لا تـطـرح الـحـبـل فـالـغـارب

ما دُمـت قبطـانه الـسـاهر لا صــار فـالـقوم غـيـبوبه

مـاشـي ورا نـزلـتك دافع إرجع ع مـنصبك حـاسب

طـالـع وحافـظ على إسـلوبك وكل شاعـر له إسلوبه

من با تعاقب قد الهفوه قامت مـن الضفر للحاجب

سـع غلطة إحدش فـبراير صارت ع الكل محسوبه

ما عدلك الا استند واحمل ماجاك وامشه ع الصايب

واتجـنّـب الذيب ذي يكـتب كلمات مـن قبل مكتوبه

لا حزّك الشـر فبشر بي كم قـلت لك بـفعل الواجب

وانت اسـتهـنـته وهوّنتـه لامـا تكبـدتـه الشـوبـه

بقبضتي سيف يشبه سيف حيدر علي بن ابي طالب

مـا ينـزل الا ع حــتـرة ذي مارضـي يـعـلـن الـتـوبـه

انا احسـبك مـنهّـم وانـتـه لا تـنـتـقد مـنّـهـم صـاحـب

ما دامك انتـه ذي اتـبـدّع وافـعل حسـابات ملقـوبه

بالوهم سويت لك دوله واسرفت فالحكم يا راهب

لو ضهرها يِمّن الخايف قد  جوفها يدّي الزوبه

لوما انت واعرف كثر فيهم ما يسلموا سيفي الضارب

انته عرفناك والباقي عـدبه صــور شــبـه مـقـلـوبه

كـلاً فـتح له ســجـال اترن والان لا رُكـبـته حانـب

يشتيني اتكلّف اشرحله كيف يدخل الشيء من بوبه

ما اضـن من بينكم شاعر يـقـدر يصل نجمي الثاقب

مادام مفتاح  قايدكم خلـونـي اسـحب بـعـرقـوبه

.............

قصيدة الشاعر / مفتاح الاسرب المغدي

جواب على قصيدة الشاعر عبد الله عبده التام.

...........

ارحـبـت يــا درعــي الـواثـق ونـجـمي الـشاهب الـلاهب

ذي لا حـضر يـغرق الـمعنى مـن شـهد حـرفه ويـعسوبه

شـوفك تـرى قـوة الـقوه مـن صـادقك مـا رجـع خايب

ومــن يـغـيضك بـحرف اعـوج وجـب عـلى قـنحته يـوبه

يـقـول ابـو خـالد الـشاعر خـذ مـا تـبي مـن قـلم كـاتب

وكـــل كـلـمـه تــجـي مــنـي لآشـــك بـالـكـنج مـنـسوبه

وكــل جُـمـله لـهـا طـابـع فــي بـصمة الـعين والـحاجب

بـغّض عـن مـا كـتب غـيري فـي وصف صورة وفتشوبه

قـد ذي اشـوف الـزمان اعوج ما عاد به حرف متناسب

واشـوف سـمن الـجُمل يـطلع مـن غـير جـدبي ولا روبـه

واشـوف كـمن ضعيف اهوج بمدفع اهل الجمل ساحب

والـشـعر قــد بـندقه داحـق وانـتم قـسم مـا تـحسو بـه

بـلاغـتـه مـالـهـا مـعـنـى وصــورتـه فـــي ولـــد راســب

وعـنـتـر الـشـعـر يـــا عــبـدو قـــد كـفّـنه فـيـه شـيـبوبه

الــشـعـر صــــورة جـمـالـيه مـخـطـوب لازم ومـتـخـاطب

يـستشعر الـلي دخـل بـينه فـي ضـرف خصمه ومكتوبه

مـفتاح الاسـرب غـدا صـوته فـي سـاحة المعرفه شاحب

مــن كـثر مـا صـار يـتحطم خـايف تـجي داخـله نـوبه

يا صاحبي لو طلع يحسب في ذا الذي نبصره حاسب

لا يــركـز الـرقـعـه الــسـوداء ويـهـجر الـجـوبي الـجـوبه

كـن افـهم الـعلم واتـفطن مـن شـور ابـو خـالد الصايب

وحـس فـي مـا تـحسس بـه وتـحتسوا زغُـط مـن كوبه

هــاذاك بـدعـك تـفـنن بــه وانـا وجـب صـدق بـآ اجـاوب

ولا تـصدق صـراخ اشـخاص قـالوا مـن الـبدع مـعيوبه

..............

زودنا بالقصيدتين الأخ سيلان البشاري