قصيدة الشاعر/ محمد عوض باكر

يالله أدعيك يامنشى نشا نشو لــمــــزان

قالها الشاعر قبل 75عام بالتحديد 20/6/1365هجريه

في حادثه لم يحصل لها مثيل بين أبناء العموم من تجار الجنابي في منطقه خوره التي راح ضحيتها اربعه مقاتيل من مناصب خوره الساده

.............

يالله أدعيك يامنشى نشا نشو لــمــــزان

انا احمدك واشكرك ماارخى المطر في مزانه

انا احمدك عد ما تخلق خلايق وعضـيان

يحصي الرمل واحصى البوش معزا وضانه

قال بن باكر البارح سرا نوم لعــــــيان

يحرم النوم ما حاف السبل في مكـــــانه

يوم جاني خبر ساده رجاجيل شبـــان

اربعه من منـاصــبنا غبيني غبـــــانه

سوقنا اليوم محزن بعد ضمدين شعبان

ما قفا الاربعه في السوق قلة لآمانه

حزنهم حط في الشرخه وفي حصن نخلان

واحزن البدع واحزن بعد صالح حصانه

والشريخ التوى حزنه بعصاب لكفان

وآهل الاسواق كل دمعه املأ حـــفانه

راحت اليوم يالحوطه ربوعش والاركان

لاربعه لاربعه في السوق سنحه وآمانه

محزن اليوم ساخط وامسمينه وجاران

كل محزن علهيم باترادف حــــزانه

واحزن انصاب والظاهر ومرخه وحبان

واحزن الكور من شروان لما دمــــانه

والعوالق وسوق الحاظنه واهل بيحان

ماعله يمتحون الحزن من غير زانه

قالوا الشرق هدتهم ولاعاد حد بان

ساعه الويل شلت الآربعه بالضمانه

بعد ذا العلم يا غبني عليهم بالغبان

لكن الحكم حــكم الله وما راد كــــانه

والقضاء والقدر مابايخلي بها نسان

حكم ربي منفذ في الخلي والملانـــــه

بعد ياهاجسي طاب السمر وانت ضميان

طاب ماهو سلا عقلي وشله جنانـــه

جيت بانام وأنه جاب لي كلمه انسان

كلمته ذبته ذي قال لي من لسانــــه

بعدهم باتقر الخيل تحقى بالرسان

مهر صالح على صالح يعالج رسانـــــه

في جماد آخر اتوالو دلاعيس شجعان

يوم عشرين في يوم الثلوث الحزانــه

في سنه خمسه وستين حصلت الاعلان

والثلاث المئه والاف جانا بيانــــه

ورخ اليوم بالهجري وقد كان ما كان

هجرة المصطفى ذي عظم الله شانــه

بعد ما آمتدت الشرقه تلاقوا بالايمان

والحيور التقت على الماء وقدها ضمانه

دمهم بين جربت شمس وألقيد شنان

غبن من ضيع اليسرى وضاعت يمانه

راحت اكتافك العوجان وياحير ثعبان

ذي بهن تلطم الشيطان يخزى مكانه

الآربعه صانوا الطرشان والسوق مصتان

لا قبيلي سرف في السوق صموا باذانه

آمنو في شبوبتهم حضارم وقروان

حجبوا ع الصياني من عيال الخيانه

ان تباهم دواء باتشربه لا أنت وجعان

وأن تباهم كرامــه وان تباهم شطانه

سوقنا تحتهم مثل الهجر تحت لهمان

لاسقط حيد لهــــمان اصبحو في مخانه

من ذكر زمانهم يقمن الليل قمان

ليله الشح يبدا الزام ويطلع علانـــــه

والله ماحد كما احمد شيخ شاره وبرهان

ما اثقله يوم يتكلم وماحلى لسانــه

تعتب الناس ما احمد شيخ ماعتب انسان

وأن عتب هوه يسكت ما يبين بيانه

والثلاثه سو ماحد جزع حد بميزان

من عرفهم سهر والنوم فارق عيانه

ياالله انك تعوض بعدهم ياكريمان

وافرغ الصبر ياالله في الكبود الحزانه

والف صلوا على طه النبي نسل عدنان

النبى التهامي شافع أنسه وجانه

...............