قصيدة الشاعر/ صالح السلال مزروع (أبو همام)

مساك بالنور وينك ياضماري تعال

بدع موجه الى الشاعر أبو احمد الناصري 

.............

مساك بالنور وينك ياضماري تعال

حتى نسوّي على صرح الأدب نص ساعه

أن اشهد ان انت للجودات مضرب مثال

وانا اشهد ان انت رامي جيد ما اخطى نصاعه

تعيش ياناصر الله يجبرك بالعيال

نجيت ياأخ ما فلّت خويه وباعه

والله ما ودي الفرقا وقطع الوصال

ولكن الوقت يجبرني لفرض القطاعه

قدرك وقدر الجماعه كلهم لايزال

والله ماانساك ياناصر ولا انسى الجماعه

يا ناصري يا صديق العمر كنز الرجال

تجارته مثل كنز العافيه والقناعه

............

قصيدة الشاعر/ أبو احمد الناصري

جواب على قصيدة الشاعر صالح السلال أبو مزروع

..............

يامرحبا بك يوازن عاليات الجبال

مرحب ملان الفضاء كامل وبحره وقاعه

ويملي أرض اليمن جنوبها والشمال

بمعدن الطيب والجوده ورمز الشجاعه

ياجيد مايشعر الا بالحروف الجزال

نبع الوفاء اوفا من اليره وحب الجراعه

في مدح البطال يعجز هاجسي والمقال

ياموطن العرف والمعروف واهل الوقاعه

تحضر مع صاحبك في سلم ولا قتال

يفداك ذي في الشدايد يسبقوه الفراعه

ما عمر أبو عبده الغالي جنح واستقال

اذا دعا له صديقه قال سمعن وطاعه

شف قدرك اغلى من الدنيا ومكسب ومال

كسب الرجاجيل وش كسب الزلط والبضاعه

الله يسهل لبو همام رزق الحلال

والضيق والضيم من دربه يطوي شراعه

...........

زودنا بالقصيدتين الشاعر عبد الاله الدغري