قصيدة الشاعر/ شامي الشامي (أبو اقدار)

بواقدار قال الليله عقلـــــــــي والفواد اتحضـر

بتاريخ 5 يونيو 2020م  بدع موجه الى الشاعر محمد علي الميثالي أبو فايز

.............

بواقدار قال الليله عقلـــــــــي والفواد اتحضـر

والهاجوس جاهز عندي يكتـب قافيه جبريــــه

يا بنتي وقره عيني هاتي لـــي قلم و الدفتـــر

اكتب ياقلم وتفنن وارســـــــل قافيه فوريـــه

ياالهاجوس لا تتسرع لاتفشـر  ولا تتبختــــــر

هدي روعتك واتورع عـــــادي ليلتك بدريــــه

طلع كل مافي جوفي واوبه و انتبه  واتحــذر

لاتغلط على بوفايز تصبــــــح حالتي مزريــــه

بوفايز رجل متواضع طيب ما يحب المظهـــر

بين الناس طيبه ينفح مثـــــل الباقه الورديـــه

شاعر محترم متخلق  لا يزنــط ولا يتكبـــــــــر

ماهو مثل مابعض الناس يقلبها عليك سخريـــه

ذي ما يعرف الميثالي يسئــــل عنهم يتخبــــــر

يسمع للجواب من عندي فـــي قيفاني الحصريه

اصل المرجله والنخوه في كل المواقف يذكـــر

مثل المسك طيبه ينفح فــــي كاساته العطريه

ما جيت امدحه واطبل لن الكذب عندي منكـر

مادون الحقيقه قلنا لاطبـــال   ولا فشريـــــــه

شاعرنا وشاعر عصره في كل المحافل صــدر

حرفه والقلم يشهد له هـــو و أبياته  الشعريـه

هذا كل ماهو عندي والخافي عليكم أكثـــــــر

يابو فايز الميثالي اقنـــــص قافهـــــا صدريه

يابو فايز ااااالميثالي حرفي للقوافي شفــــر

لو تعرف تفك الشفره فـــك أرقامها السحريه

............

قصيدة الشاعر/ محمد علي الميثالي (أبو فايز)

جواب على قصيدة الشاعر أبو اقدار شامي الشامي

............

قال الشاعر الميثالي هاجوس القوافي شمّــــــــر

رص الباخرات في المينــــا و اسطولاتي البحريه

الجمهور من يعرفني عبـــــــر الفيس و الماسنجر

قناص الحروف الرامـــــــي لا حطيتها صدريّـــــه

وصلتني حروف الشامي و انا اعتز فيها و افخــر

ما دام الفتى يمدحني فــــــي قيفانه الفخريّــــــه

ابشر بالجواب الشافـــــــي لا تزعل و لا تتكــــدّر

باخطه بروس اقلامي فـــــي المخطوطه الحبريّه

حيا بك و حيا اقوالك ما رعد الغمايم زمجــــــــر

ترحيب الوفا من قلبي عـــــدّ ايامنا الهجريّـــــــه

ابياتك تسر الخاطر محـــــــلا سحرها و المنظـــر

مثل الشهد في معناها نكهـــة طعمهـــا خمريّـــــه

الشاعر يصيغ ابياتـه متكلّـــف يقلّــــــــد عنتــــــر

مهما كان يعمل جهده يجعلهـا  درر نثـــــريّـــــــــه

و انا اشهد بأنك شاعر تستاهل صعــــــود المنبـــر

تخضع لك حروف اشعارك دام الهوجســه فطريّـه

ما هو طبعي اتجاهلكم باجهــّز جوابـــي مضطـــر

و اقبل ردّي المتواضع شــــوف الوانــه الزهريّــــه

الموضوع ما يستاهـــل مـــــــا يحتاج أن تتأثّــــر

خلّ الشفره المقفولـــه تبقــــىٰ مغلقـــــه سريّــــه

............

زودنا بالقصيدتين الشاعر أبو فايز الميثالي