ايش الصباح الشوم هذا اتعوذبي
مساجله شعريه ساخنه بين أبو مفتاح البخيتي والشاعرة العنقاء الماربيه ومداخله للشاعر عبدالله الحياني والشاعر عبدالاله الدغري . بتاريخ
2 يونيو 2020م.
البدع
من الشاعر أبو مفتاح البخيتي معلقا على
منشور الماربيه
..............
ايش الصباح الشوم هذا اتعوذبي
بتكلمينا اليوم من راس النخر
يمكن تصعرتي وقلبش غاضبي
اولا السخط ذي فيش من كثر السهر
..............
زامل
الشاعر/ العنقاء الماربية
جواب على زامل الشاعر أبو مفتاح
البخيتي
.............
سمعت قالو قد ضهر فيكم نبي
اسمه علي ناصر صحيح هذا الخبر
توني صحيت صليت واديت واجبي
واستغفر الله يا عسى ربي غفر
.............
زامل الشاعر/ أبو مفتاح
البخيتي
جواب على زامل الشاعرة العنقاء الماربية
............
ما قد سمعت الا بواحد مآربي
قالو قدو ياذاش مهدي منتظر
لا عد تغاوي شي ولا عد تكذبي
قد كان في السبعين با يذبح بقر
...............
زامل
الشاعر/ العنقاء الماربية
جواب على زامل الشاعر أبو مفتاح
البخيتي
...........
ماهو نبي فكر وارجع واحسبي
مهدي مذكر هو خليفه للبشر
بشر به المختار ليش انت اشعبي
مفتاح باب الخير يا مفتاح شر
............
زامل
الشاعر/ أبو مفتاح البخيتي
جواب على زامل الشاعرة العنقاء
الماربية
...........
بايعتوا المهدي وبعدا صاحبي
شافه قدو كافر وهو مثله كفر
وانجا محمد ناصر اينو جاوبي
ماصاحبي قد عزها وقت البكر
.............
زامل
الشاعر/ العنقاء الماربية
جواب على زامل الشاعر أبو مفتاح
البخيتي
...............
مدري تغابي منك او انك غبي
تكفر انسان من غضب ربي نذر
يدعو لدين الله من توه صبي
وصاحبك بالشرك يا مفتاح جهر
..............
زامل
الشاعر/ أبو مفتاح البخيتي
جواب على زامل الشاعرة العنقاء
الماربية
................
يا مآربيه قد كفر عم النبي
آبا لهب ذكره تردد في الصور
من تاب عاد الله خير التايبي
ومن كفر واشرك فبا يصلئ صقر
مفتاح لقبي ورثه جدي وابي
والحصن من فوق البوادي والحضر
لانتي من اهل العز هيا اتلقبي
ذي يخفي اصله تجهله كل الاسر
............
زامل الشاعر/ عبد
الله الحياني
تعقيب ومداخلة
.............
اليوم يا مفتاح لبه مطلبي
وصالح العنقاء يكفي ماصدر
الدين واضح والامين آخر نبي
من ادعا خالف وبالمله كفر
..............
زامل
الشاعر/ أبو مفتاح البخيتي
جواب على زامل الشاعر عبد الله الحياني
..............
قد با نصالح شابهم والشايبي
وتآمن العنقا ومأرب بالقدر
واني عتبقى في حمات الاجنبي
فحنا لها لابد ماترجع جبر
.............
زامل
الشاعر/ العنقاء الماربية
جواب على زامل الشاعر أبو مفتاح
البخيتي
.............
انا عواضيه واصلي مكسبي
لا للتصالح دق ناقوس الخطر
اثنينكم مغلوب وانا الغالبي
والدين واضح يا قليلين البصر
..............
زامل
الشاعر/ أبو مفتاح البخيتي
الجواب الاخير على زامل الشاعرة
العنقاء الماربية
..............
احنا حماة الدين كيف بتعقبي
واحنا حماة الارض من حلف الغجر
انش معانا فرحبي ثم ارحبي
وانش معا حلف الخون دمش هدر
قد حلفهم مهزوم وانتي جربي
من خاننا هو يوم يحرب واقتبر
مابا يفيدش ذي يقلش تحربي
نصيحتي لك والحذر ثم الحذر
.............
قصيدة
الشاعر/ عبدالاله سعد الدغري
تعقيب ومداخلة
.............
حوار بين الارنبه والارنبي
ما احلا المجاره بين الانثى والذكر
مفتاح باقفاله في انس مختبي
والماربيه مختبيه في يهر
وتحول اصوات الرصاص الذايبي
الى جدل ما بين وجهات النظر
والشاعر الدغري فضولي واشعبي
بين الثنأئي لا حشر نفسه حشر
باضحك على بلقيس مثل اليبيبي
واجيبها لك بالعبايه والمصر
وتعتنق ديني وتذهب مذهبي
ياعبد شمس اسلم مع عبد القمر
والجن يدو عرشها لا مكتبي
في صرح مرمر نعقد اول موتمر
واقلها ان جا البنك وان جاء راتبي
فلن اسامح من نهب حقي وفر
وارجع بذي جاء زاحني من منصبي
من بعد ما قد كنت قايد معتبر
حطي سؤالش واسالش واتجاوبي
ولو
توافقنا وكل اعوج سبر
اشتي ضمانه تضمنش لا تقلبي
وتزوجي مفتاح محمود السير
وان مالقينا حل زين اترقبي
مقدم علي ناصر بجنه والبشر
............
زودنا
بالمساجلة الشاعر عبد الاله الدغري
0 تعليقات