قصيدة الشاعر/ صالح السلال مزروع (أبو همام)

أبو وفاء قال يا قلبي ويا كبدي

8 يوليو 2020م

................

أبو وفاء قال يا قلبي ويا كبدي

من هم وقتي ومن ضيقه ومن نكده

ومن مواجع كثيره لخبطت رصدي

ومن عيا قلبي الدامي ومن عُقده

لاجات الافراح من مصدر طريق قَدي

ساعه وتصبح هدايا الجن والمرده

لاحول كم لي وانا صابر على كمدي

لو بان خُبري تشفّو فيني الحسده

يامرزح الظهر يافخري وياسندي

معزتك في صميم القلب معتمده

أنت الذي قد ملتكه حبّي الأبدي

واخذته الوِد ذي ما يحتصي عدده

ياأخ لا ضاقت الدنيا مسِك بيدي

رمز الأخاء ما غفل عنه ولا افتقدَه

ما ودي انك تحاسبني على عندي

خواطر اهل الوفاء والطيب مضطهدَه

مااقطع حبال الوفاء لو يقطعو قلدي

وكل واحد وله توقيع في سنده

وسمعتي مثل شم المسك في بلدي

مااتابع اهل الخزى واللوم والفسده

ولا استمع حد ولا امشي في طريق ردي

إنسان ما قد حدا لامه ولا انتقده

راسي معنن وتبقى شيمته مددي

مايخضع الا لرب العرش ذي عبده

ولا تكلمت بااتكلم كلام قدي

والعرف ياابو علي موزا لمن نشده

ماانا مثل ذي يقل لك قد هدي وهدي

يتصنع العرف ياعزي وما يجده

ولا من اصحابه شلّة عبده الجندي

ذي سوطهم لا لفي ظهر الوفاء جلده

ماابادي الا من الزينات كل بدي

ويشهدو لي بني مزروع والجرده

هذا ويااعز من مالي ومن ولدي

ما تستوي طلقة الليبي ولا الكنده

..............

زودنا بالقصيدة الشاعر عبد الاله الدغري