قصيدة الشاعر/ عبد الفتاح ناصر الزُبيدي (أبو ليث)

 

قال الزُبيدي يا شوامخ زُغبه

 

بدع ارسلته للأخ محمد_جبر_الزُبيدي من اهالي قرية_زُغبه_مخلاف_زُبيد_عنس وجوب على بدعي وعقبت على جوابه وأعفيته من جواب التعقيب اليكم السجال كامل بدعي يقول.

 

..............
 
قال الزُبيدي يا شوامخ زُغبه
نَبّي محمد جبر يقرا المكتوب
 
سلام يا ذي مِتّزِر لا الرُكبه
ياذي براسك عز راسي معصوب
 
ما اعزكم يا اعز واغلا عُصبه
في عين ابوليث الأديب المحبوب
 
حتى ولو قرطب شداد الغُربه
عادو عليكم يا محمد محسوب
 
عاد في عروق الدم يجري حُبّه
للقوم ذي يجلو كروب المكروب
 
زُبيد ذي ترعا حقوق الصُحبه
الفسل فيها في النوايب مقطوب
 
ما تنجب إلا كاشفين الكُربه
ما تنبذ إلا كل عايب معيوب
 
قومي وقومي مرهمي والعُطبه
وبلسمي لا صار جرحي معطوب
 
اي والله إنُّم بندقي والجُعبه
متى غَضَب موسى عصا صبر أيوب
 
طالب جنابك يا ابن عمي طُلبه
وانته لها من بعد ربي مطلوب
 
لا لك بَصر نَقّصت سعر العُلبه
تقدير منك للحنش ذي بيلوب
 
وان ما معك مخرج فِمِنّي حُبّه
تحطها فوق الجبين المنصوب
 
.................

قصيدة الشاعر/ محمد جبر الزُبيدي

 

جواب على قصيدة الشاعر عبد الفتاح ناصر الزُبيدي (أبو ليث)

 

...............
 
يا مرحبا مليون عالي رتبه
ترحيب غطاها مشارق وغروب
 
بابن الزبيدي محزمي والشبة
ذي لا وزنها حطها في العرقوب
 
بو ليث مني يارسولي جَبّه
بعود هندي في شماغه معصوب
 
قله تعزوينا بما في الجعبة
وراس مالي صاحبي ذي محسوب
 
نيني عيوني لا فتحت ابصر به
ولا غمضت امسى بوسط الحلبوب
 
فيه الشهامة والوفاء يوصف به
عزيز غالي للجماهير محبوب
 
زبيدي المنبع ونعم الحسبة
بين الفطاحل والنشامى محسوب
 
وما طلبته يا صفي ابشر به
بس الخساره صاحبك ذي مغلوب
 
السعر ثابت في الجُمل و الحبة
مثل الخلايا ذي تشرعها النوب
 
تكفيك منها يا الزبيدي شربه
ترد روحك وانت عاطش ملغوب
 
واقبل تحية صادقة من قلبه
تزور دارك والدوائر والبوب
 
...............

قصيدة الشاعر/ عبد الفتاح ناصر الزُبيدي (أبو ليث)

 

تعقيب على جواب الشاعر جبر محمد الزُبيدي

 

................
 
حيا بذي رَتّب حروف الكِتبه
وارسل مع طربال نوعه مطلوب
 
يرحب على الحاشي وقات الكِتبه
وماء سوا ذي عندي أحلى مشروب
 
وصل جوابك ذي ندبته ندبه
مع الجَبَا جاني مع اول مندوب
 
يقول ذي داره براس التبه
فرع النقا شاعر زُبيد الموهوب
 
ما عزوه إلا بالرجال الصلبه
ما الذايبي قد به معوّض مضروب
 
وراس مالي بالمهام الصعبه
غمران مثلك يا السلاح المجروب
 
تفزع وتنفع لا حنبنا حنبه
تقطع وتبضع لا حليبي محلوب
 
مالي ومال أهل المرق والحلبه
لا لي بهم رغبه ولا انا مرغوب
 
وامثالكم تعرف أصول اللعبه
وامثالنا تكشف خيوط الملعوب
 
هدف خرافي سجله راس حربه
بآخر دقيقه عنتر أقنع شيبوب
 
ومثلما حَلّل طواف الكعبه
حَرّم على يوسف خسارة يعقوب
 
ومن قطع بالصدق حبل الكذبه
يشلها راضي ولو هو مغصوب
 
قد قلت لك من قبل لا لك رغبه
حافظ على الملكه وعِين اليعسوب
 
وان حالتك يا شال راسي صعبه
نرفع لك البيضاء بقمة شربوب
 
.............
زودنا بالقصيدة الشاعر أبو ليث الزُبيدي