قصيدة الشاعر/ احمد صالح الرقيمي

 

يا فاهمي سر عبدك وانته ادرا به

 

بدع موجهة الى الشاعر أبو سياف حميدان

 

..........
 
يا فاهمي سر عبدك وانته ادرا به
والمبتدأ لك ويوم الحشر والميعاد
 
سبحان ذ يما يفلت من تلجابه
ولا يفك المطيع العابد الزهاد
 
ما يهمل العبد ذي واقف علا بابه
يبدل العسر بالميسور كفما راد
 
يارب زادت هموم الشعب واتعابه
والشر واقف لهذا الشعب بالمرصاد
 
والوضع خارب وصاب الشعب ما صابه
واهل الفتن دخلونا في فتن واحقاد
 
في ذنب الاصلاح ذي قالوا هي اسبابه
وذنب ذي قال هوبا يقلع العداد
 
وفي النهايه قلعنا واقتلع نابه
والشعب صابح ضحيه فيد للجلاد
 
......................

قصيدة الشاعر/ أبو سياف حميدان

 

جواب على قصيدة الشاعر احمد صالح الرقيمي

 

..............
 
يقول ذي حل شمخ سود مهبابه
صرم الحبش شيدوا فيه الكرم شياد
 
من حال غلمه وفيه قوم حرابه
حجاب ربي عليهم من هوى الحساد
 
قال الجمالي أديب الشعر حيا به
حيا الرقيمي ملا شعبي ربى وأنجاد
 
حيا بمن حبه أصبح منطق أصحابه
أحمد رقيمي علومه من رجال أجياد
 
دارالكرم والمروه فاتح أبوابه
وصية الجود وصاها على الأولاد
 
ترحيب بك ما يليح الفوج وأسرابه
وما بروقه تلالي وأنتفض مرعاد
 
والجسم من طيب قولك زالت أتعابه
أنا أشهد أنك على ما أمضوا به الأجداد
 
أحترت ياذاك من شعبي ونوابه
أرض السعيده تولوها فصيل أوغاد
 
أهتان من كان فيها عاصر أنيابه
وأصبح له أيام عده ما تهنى زاد
 
أهوى على شعبي المجروح وأهوا به
له سته أعوام بين القهر والغيداد
 
الله يصيبه من أبلا الشعب بصوابه
ماعد مع الشعب لا رامي ولا عواد
 
والقتل حاصل ونار القتل شبابه
وكل واحد يروج قتل وأستشهاد
 
وصابح الشعب كله وسط محنابه
وأتعسر الوضع للضابط وللأفراد
 
أوعاد شي حل ياعقال نرضى به
ندارس الوضع ما ينفعشي العقاد
 
يا أحمد رقيمي تهاوى الشعب وأربابه
وكل واحد يدورها على ماراد
 
ومركب البحر عيف أثر ركابه
وعيفة القوم ساروا للبلد رواد
 
يوم المثورات ثار الشعب بقطابه
أعوام والشعب بين الضرب والهداد
 
السحر معروف والساحر هو أدرى به
هو المسلط على النقاص والزياد
 
بنى عروشه على مدفع ودبابه
وأمست عقود السقيفه من قفاه أعواد
 
سار الشره سار ذي قد كان يحظى به
والحكم بعد الفخامه نفي وأستبعاد
 
وصابح لقصر بعد الأثر ملعابه
وأتغير الوضع ذي قد كان له معتاد
 
أستوطنوا أرض حمير قوم عيابه
حطت خطاهم طريق النهب والفياد
 
منهم تزحزح جبل عيبان وأعتابه
ناحت صخوره على السياح والوفاد
 
والعاصمه كل شارع فيه مخلابه
من شوفت الوضع ذي يتفطرين أكباد
 
يالله بنظره تغيث الشعب وأشعابه
بدل على الشعب من بعد الهموم أسعاد
 
خيل قنيف المثوره لا لمع زابه
لابد من حل ما ينفع شي اللداد
 
والعاقبة با يزول الشر وأذنابه
والأمر لله ما ينفعشي النداد
 
ما خاب يا أحمد رقيمي من تلجا به
سبحان من جل ملكه مرسي الأوتاد
 
عروه وثيقة ينجي من تنجى به
مذري ريح العوالي في الحضر والباد
 
صلاه تغشى رسول الله وأحبابه
أعداد ماذي تصلي بسمه العباد
 
..............
زودنا بالقصيدتين الشاعر أبو سياف حميدان