قصيدة الشاعر/ عبد العزيز احمد القطراني

ما انا  بحاجة  حد يقلي ونعم

 

بدع موجهة الى الشاعر/ ابو حمد علي عبدالله صالح القطراني 10/9/2022م

 

.................
 
ما انا  بحاجة  حد يقلي ونعم
ولا  مساير   حد   رياء   او سمعه
 
ولا مصاحب  حد لاجل  الدرهم
ولا المشيخ  اطلب  ولابه  طمعه
 
ذي ماعرف عبدالعزيز   يستعلم
كيف صحبته لااصحب وكيفو طبعه
 
الناس   اقيس  اجناسها   واقيم
واطرح مكان الشخص حسب البقعه
 
الكفو اعزه  واحترم له  واكرم
وافعل  مكانه  فوق  راسي  قبعه
 
والفسل اطلق  صحبته  واحرم
واطرح مكانه فالمكان الشوعه
 
ذي لاحضريشتي يكل ويقمقم
ماهمه  الاكيف   يلهف   طبعه
 
وعاده   يقلد   شيخ   ولا فندم
وهو  مقصر   غرمهم    ما دفعه
 
ولا  غرم  فنص   غرمه   يقسم
سعذي يصلي فرض واخفا ركعه
 
ذي مثل هذا النوع قلبي يخصم
لوكان من ماكان وكيف مانوعه
 
ماالصاحب الوافي  وربي لااقسم
من  نص  لجعي له  ويهدا  لجعه
 
واوقف معه في الطارفه  متحزم
واحط  راسي  شق  راسه  جمعه
 
ياابو حمد  ذي   مافهمنا   فهم
كيف الصحب فالعرف وايشو شرعه
 
 
وايش قيمة  المطال  والمتنسم
ويش يفعلو  به ذي  يفلت  ربعه
 
حبل الصحب واكي وبه  بانفلم
خيط الفساله ذي ماحدامتبعه
 
هي ظاهره يامن سمعته واعلم
وبلغه   لا  عند  ذي    ماسمعه
 
.................

قصيدة الشاعر / علي عبدالله صالح القطراني (أبو حمد)

 

جواب على قصيدة الشاعر /عبدالعزيز احمد القطراني

 

..............
 
يارب   اسالك  للعواقب   سلّم
يامن إليك الخاتمه والرجعه
 
والعبد مستسلم بدينك مسلم
اهده  ويسر له  وحسّن وضعه
 
ولا  لغيرك  ياكريم  استسلم
وظل عبدك بين ظل السبعه
 
الليل  ياقلب  الفتى  المتئلم
خيّل معي  برقه وتالي وقعه
 
برق القوافي والقنيف المردم
كنّه  علينا   بايهملل  سجعه
 
من عند شاعر للحروف معلّم
اخو علي  نبع المعارف نبعه
 
ياصاحبي قولك وصل متنظّم
فيه القوافي  والمعاني  روعه
 
والعلم  واضح  مايريد  مترجم
من طيب اصله قدتفاطر فرعه
 
والعرف  من فوق العوايد مردم
وللصحب  فوق  الشوامخ  قلعه
 
من  صانها  ماحد  لغزوه  يعزم
ولا تصيبه   من  عدوه  لسعه
 
والعرف شرعه بالضوابط يلزم
من خالفه واجب  علينا قمعه
 
ومَن مِن اضلاع  الصحب  متلحّم
هذا وجب  نفيه وواجب قطعه
 
ومن نفوه  القوم  حاله  يرحِم
يعيش منسي  ماتجي له فزعه
 
ومن تحكّم  في  قضيه  يجزِم
يضبط وتوثيق العدايل  درعه
 
والغُرم قد بكّا  اليتيم  المعدِم
بكّاه  من  جوره   وسيّل   دمعه
 
من  أخّر  اغرامه  جزاه  يحشّم
غُرمه  ويستاهل  وراها  صفعه
 
والجيد من حَب  الجمايل يتلِم
ومن  زرع جوده  حصد  مازرعه
 
والفسل  خلّه  بالعجاف  يغنّم
تموت  عجفاته من اول  ردعه
 
ياصاين  اركان  الصحب ومرمم
ونعم   بحالك   ماتهزّك   رزعه
 
تميت   علمي   ختمها   وا ختّم
صلاه في ختم القصيد وبدعه
 
..............
زودنا بالقصيدتين الشاعر أبو حمد القطراني