قصيدة الشاعر/ حمير مقبل القوسي

يالله يامن فوق عرشك مقتدر

موجهة إلى الشاعر محمد ناصر ابو ناصر القوسي

............................

يالله يامن فوق عرشك مقتدر

ياحي ياقيوم مالك مستشار

يامن خلقت الكون وأنبت الشجر

ورازق الحيتان في بطن البحار

ياعالمي بالغيب ذي ماقد ظهر

وفاهم الاسرار من قبل الحوار

قال أبن مقبل يابني حسين الحذر

قد صيح المعبر لحتى الدم طار

صونوا دماكم قبل ماتصبح هدر

للموت كلا منكم حاجز قطار

البيت جنب البيت لوترجم حجر

انيه تودي كارثه والا دمار

مالحرب ما حدا في النهايه منتصر

والمنتصر خسران حقه والضمار

أيش المصيبه ذي عليكم والقدر

تتقاتلو جمعه على درنه حجار

قد واحد أستشهد وواحد في خطر

وذي تكون عاد وضعه في أنهيار

والجيد ذي لا جاته العوجا صبر

حتى يداويها بحكمه وأقتدار

ومن حفر حفره وقع وسط الحفر

ومن زرع كبريت فالمحصول نار

ومن ضميره عاد هو صافي نظر

والا فهي غدرا عليه طول النهار

ومن سعى بالخير في ليلة قمر

تلمع نجومه في السماء مثل الشرار

ومن يحب الخير يجزع له سفر

والأجر عندالله في فعله مجار

ومن يحب الستر للناس أستتر

ينجيه ربه من أعمال الدبار

يقول حمير بالكلام المختصر

حب اليد اليمنى كما حب اليسار

وذي يجامل بين الاصحاب لاحضر

ملعون فالدنيا ولعنه في الديار

هذا وصلوا عالنبي يامن خضر

شفيعنا من يوم به جنه ونار

....................

قصيدة الشاعر / محمد ناصر ابو ناصر القوسي

جواب على قصيدة حمير مقبل القوسي

...........................

يالله ياذي مكسي أغصان الشجر

يامنبت الأوراق فأطراف الحرار

يامالك الأملاك فرج للكدر

أغفر ذنوبي أنت لي نافع وضار

من بعد ذا ياهاجسي سجل درر

أكتب حروفك بالذهب وأغلى عيار

رحب بشاعر جا لنا باحسن عبر

شعره حكم ينقش على أضبار الحجار

حيا بحمير مالمع ضؤ القمر

مرحوب من قلبي ويكتب في شعار

ياصلب مقبل يالفتى الشهم الأغر

ياشبل صادق ماتحب أن حد يضار

يقول أبوناصر عقد للمؤتمر

وشاور أصحابه وأتجه نحو الحوار

حاولت أنا الشر أزيله من بكر

من قبل يتوسع بكثره وأنتشار

سعيت أنا بالصلح ما أشتي للذمر

أضمد جروح الكل قبل الأنكسار

ليكن أسف ياخي قد الشوم أنتحر

دور لنفسه شر وأعمال الدمار

صدق لشيطانه دخل بحر الكدر

قتل لصالح عيب في وسط النهار

دور لربعه شر وأدخلهم حفر

ما همشي لأهله ولاهم الصغار

أبولهب بالشر قله بالخبر

تبت يداه النذل ذي لشر شار

ملعون من نافق وخطط وأبتكر

وأدخل جميع الناس لابطن الحمار

نوب المنافق في جهنم لا صقر

ذي قد سعى بالشر بايصليه نار

هذا وعاد الشوم جالس ما أعتبر

جالس يحمي نار جلده والظهار

يشتي يثير الحرب لجله يستقر

يشتي يحول الشر منه والمسار

وظن ان الصقر منه مبتهر

ماقد درا بالصقر لا جنّح وطار

عيشل صيده لو خسر كما خسر

لو سار حقه وماله والظمار

والجيد جالس كما ذيب الغدر

يشل حقه بالتساوي والنظار

يامن صبر ماقد حدن مثلي صبر

من أجل أراعي صاحبى ذي كان جار

والا عتسقي خصمنا مر الحُمر

وأسقيه نار الذايبي حمراء ونار

ماغير أنا مقمر من الناس الدشر

ذي أقتو للكل لغم الأنفجار

ما أشتيش نطاير ونهداشي غجر

من أجل يتشفو عديمين الضمار

ذي أججوا للوضع خلوه أنفجر

وثاروا الفتنه وزادونا شجار

حمى عليك يادارنا دار الحجر

ذي كان متعلي على كل الديار

أصبح خرابه كل جدرانه فصر

ياأح قلبي عليك ياعز دار

والعفو لاقد طال حرفي أو قصر

باهدي سلامي لمن جانا وزار

بيضاء لبوماجد ومن جنبه حضر

ذي قد سعو بالخير لصلاح الغيار

والختم صلوا على طه الأبر

خير البشر ذي قادنا خير الوقار

..............................