الحمد لله مازال اليمن عايش
بدع في يناير 2015م .
.............
الحمد لله مازال اليمن عايش
ما مات من دون ريّس ياولد منصور
تسير والا تجي وضع الوطن فايش
لا سيرتك ضرته او في بقائك نور
ما زدته الا غلايب من بني داعش
وانشبت فيه الفتن ياخاين الدستور
ما سيت شي طول فترة حكمك الطايش
لا وفقك زدت هدمت الذي معمور
خليت شعب اليمن من باطلك طافش
والجيش مقهور جعلك ربنا مقهور
صبر المواطن نفذ ما بش أمل ما بش
ذي فيك يٲمل يٲمّل في جهنّم حور
مقلع ولا الشعب غافر جرمك الفاحش
كشف جلالك ولا التاريخ لك مستور
.............
قصيدة الشاعر / بشير الجميلي
تعقيب على قصيدة الشاعر محمد الجرف ..
................
قال الجميلي حروف الجرف مرحا بش
مرحب ملان اليمن بالشاعر المشهور
ياصاحبي عبد ربه عطف القايش
وفلت الشعب هو والجيش ذي محصور
فك الوطن والمواطن في يد الطاهش
لو قلت طرطور له بالفعل هو طرطور
غبني على الجيش غبني ريسه ناحش
باعه وشل الثمن باع البلد والسور
مهما تقل يامحمد شعرك الناقش
للحق في ظل صمت الشعب ذي مدبور
لو الجميع اتحد ضد الخطأ الفاحش
ما كان يحكم يمنا تافه او سرسور
لكن أسف يا محمد كل من فارش
من أجل الاطماع كلين بالطمع مأسور
والحزبيه سمنا والجرح ذي راهش
والقاعده والحراك والحوثي المغرور
تشتت الشعب بينه بين متناوش
وكل واحد يقل لك حزبي المنصور
واحد يفجر وواحد للدماء عاطش
والقتل منا وفينا والعدو مسرور
وكل من في يمينه للسلاح داغش
متى عنصحا من الغفله متى عنثور
والحل يكمن بجمع الشور ونناقش
كل المشاكل ونعمل لليمن دستور
جو نجتمع كلنا في جوها الناعش
على بساط الموده والجفاء محظور
بالحب والود يصبح وردنا فاتش
ونقول لمن جاء يطعفر شملنا محجور
وبالتسامح يصير الشعب متعايش
ومن غلط واعتذر عنقول له معذور
إذا صدقنا النوايا ننهي الخادش
لوجه هذا الوطن ونعيد فيه النور
ياشعب الايمان يرحل كل متخاوش
من أرضنا لجل نلقى للمرض دكتور
لا طائفيه تفرقنا ولا داعش
والدين الاسلام وحده نرفض التشطور
على الوطن بس با أقاتل وبا اهاوش
ومن يخون اليمن با نطرده مجبور
با اظل واقف حيادي للغلط حايش
وأموت لجل اليمن يبقى اسمها مذكور
والراس ما احنيه ولا انا من حدا واهش
والشعر اقول الصراحه يشهد الجمهور
حزبي ونبضي يمن ما آنا على الهامش
والوحده الإسم ذي هو في الفؤاد محفور
ختامها عد صوت الرعد ذي راجش
صلوا على احمد ومن صلى يعيش ميسور
...............
زودنا
بالقصيدتين الشاعر بشير الجميلي
0 تعليقات