لولا الخيانة و العماله والولا
مرسلة الى الشاعر الكبير عبد
الله محمد زياد بتاريخ 18 فبراير 2015 م..
.................
لولا الخيانة و العماله والولا
لولا التآمر من ضعيفين النفوس
ما كان جيش انهار في ساعه ولا
تنهار دوله قبل ما تغرب شموس
اين الويتنا ذي علي صنعاء حما
واين الحرس ذي ظل متفرج خروس
اين اسلحتنا والذخائر يا ولا
واين الخزينه والمصارف والفلوس
اينه وكيفه ما درا حالي ولا
من ذي تآمر باع صنعاء للمجوس
نشتي الحقيقه والخبر ذي يعقلا
من يا ومن من وزع ارقام الجلوس
والرئيس الدنبوع متحرك ولا
صمته خيانه موقفه عكس العكوس
ساع الحريوه موكبه ساير دلا
والحوثي اقبل فوق شيول ذي يدوس
يستاهل الدنبوع يستاهل فلا
ما همنا لو تموا الصلعه بموس
من بعدها يا مرسلي هيا ارحلا
شل القوافي ذي بتفحسني فحوس
لا عند شاعر ذئب بالشعر اعتلا
يلقز معانيها ويفهمها طموس
قايد محنك حر لله الولا
ثم الوطن مغروس في قلبه غروس
لوشي ميه من ضرب عبدالله حلا
لا يشعلوها مثلما حرب البسوس
بل كان ما الغازي تعدا واعتلا
كرسي الرئاسه واقتبع مثل العروس
يافخري ايش الحل في هذا البلا
نشتي تقع ليله تطيب للنفوس
والسيد المعتوه زود في الهلا
لا زم يرحله لو هدي قطام روس
نهايته مثل احتلاله بالدلا
نهاية الباغي على نفس الطقوس
كلام واقع
تعرفه كل الملا
احرار في صنعاء وفي مارب تيوس
ما جاء احتلال الا ومن بعده جلا
امثال والتاريخ سلسلها دروس
.............
قصيدة الشاعر / عبد الله
محمد زياد
جواب على قصيدة الشاعر عبد الكريم داعر البخيتي ...
...............
يامرحبا وأهلا وزايد مسهلا
من يام لا المهره بلاد العيدروس
ترحيب طول الوقت ما يتبدلا
ممزوج بالعوده بذوره والحلوس
هذا لبو الجراح مني يرسلا
لا قلت له وحده فهو تيس التيوس
ناجح وله بصمه مثقف عاقلا
واثق من الخطوه وكم غيره جلوس
بالعلم متسلح مصمم يوصلا
نشيط متفائل ولا وجهه عبوس
يا خو جلال القول فيما تسألا
عن وضعنا والشر يسقينا كؤوس
عفاش وازلامه بلانا والطلا
من حافها لا قاف بياع الغسوس
من يوم جاء للحكم ما شفنا سلا
واليوم ما يجري خيانه فعل سوس
تحالف الحاقد وغربان الخلا
والثأر يجمعهم وقلاع الضروس
كان الهدف معروف هادي يفشلا
واتباعهم من قبل دسوهم دسوس
واصبح لدينا جيش ملطام اشولا
مهروم من داخل وسيقانه سلوس
من واجهه يسلم وهو من يقتلا
وهو اسير الحرب وارباب الحبوس
للجيش مثل الامن موقف مخجلا
فيما جراء من غدر والعسكر عتوس
لا قلت هانوكم يقولو لك فلا
قد خلو الدانات مثل البقدنوس
لا تنظروا هادي بمنظار احولا
وكل من حوله لهم عدة نخوس
هذا هو الواقع فلا نتجاهلا
ما واجهه والبنت ذي جاته عنوس
لكن مع هذا وهو يتحملا
جانب من الفوضى ومن تلك الغروس
...............
0 تعليقات