قصيدة الشاعر / علي عبد الله القطراني (أبو حمد)

الله يا حظّه رشيق الجناحين

مارس 2017م.

.............

الله يا حظّه رشيق الجناحين

يحلّق بجنحانه وينسى غبونه

لا يعرف الزلّه ولا يعرف الشين

ولا خان له صاحب ولا حد يخونه

اما البشر كلين يذبح بحدين

يطعن ويثني في رفيقه طعونه

يا ويل حالي صرت يا الهم همّين

كن العناء تاجر وقلبي زبونه

مثلي مثيل انسان متجرع البين

لا اقدر يجي ربعه ولاهم يجونه

مثل الذي تايه ولاقا طريقين

وحيرته زادت وثارت جنونه

وغصب عنّي سال دمعي من العين

وقلبي مع الونّه يردد لحونه

بكيت من حالي وبكّاني الدين

والوقت خيبني وخابت ضنوه

لا وين يا اسطول التفاكير لا وين

ابحرت بالركاب من دون مونه

اين انت رايح وانت ما بين نارين

امشه كما الواقع يمشي بهونه

عقود عدّت بي واعوام مرين

ولا سنه مرّت عليا حنونه

من شافني ضاحك والاسنان يبدين

يقول يا حظه حياته مصونه

ما يدري ان أضلاع صدري يونين

والقلب يتألم ويبكي شجونه

والليل من جور المعاناة ليلين

وعشقت من ليل المعاناة لونه

يا نفس عينيني على العز تكفين

القلب ما يحمل حياة المهونه

لا ترضي الذلّه على شان تسلين

ولا تطيعي الفقر داخل سجونه

عيشي بعزه دام للحمل تقوين

والذل شُبي النار داخل عيونه

وعند رب الكون مدي لكفّين

ادعيه وحده واطلبيه المعونه

أو تطلبي فزعه من الصاحب الزين

من يشفي اوجاعك وسرك يصونه

كم صاحباً تنظر عيونه يهلين

ولا يوم غلق عند ضيفه حصونه

لو غيّبه شره عن الناس يومين

يجو جميع الناس يتفقدونه

ما هو مثيل اللي ملبّس لوجهين

ما يفقدوه قومه ولا يذكرونه

وبعضهم كالصفر ما بين قوسين

وفي خانت الارقام ما يحسبونه

وبعضهم كالثور بارز بقرنين

يناطح الصخره وكسّر قرونه

وبعضهم ماله من الهم حرفين

ما همه الا كيف يشبع بطونه

اهم شي دخان والقات شكلين

من أجلهن لو باع من يقربونه

والبعض أمواله من الخزن ملين

والزاد في بيته مخاصم صحونه

ما يدري اخر دار يأويه مترين

وحيد في بطن الثراء يدفنونه

نحصي الليالي والليالي يعدين

والشخص ما يعلم بغفوة جفونه

واعمارنا تمضي والايام يمضين

نطيح طيحات الورق من غصونه

يا ما ملوك امسو وصحيو بقيدين

وياما فقير اصبح قد الكون كونه

واكبر عجيبه يوم للدين حزبين

واهل النُها قادات حوله ودونه

طعنا الهواء حتى اقتسمنا فريقين

والخير عند الغرب يتقاسمونه

بكيت حُرقه والمداميع يصبّين

ومنحر الرجّال دمعة عيونه

ختمت قولي والقوافي ينوحين

وزادين في حبل المعاناة غونه

صلوا على المختار جد الكريمَين

ما المسلمين في يومهم يذكرونه

............